इरान–इजरायल तनाव फेरि चर्कियो, मध्य इरानमा हवाई आक्रमण

काठमाडाैं । इजरायल र इरानबीच फेरि युद्ध चर्किएकाे छ । केही दिनदेखि राेकिएकाे आक्रमण आइतबारबाट पुन सुरु भएकाे हाे ।

इजरायली सेनाले पश्चिमी र मध्य इरानका सैन्य अड्डालाई लक्षित गरी कारबाही गरिएको दाबी गरेको छ । इरानले आइतबार इजरायलतर्फ मिसाइल प्रहार गरेपछि इरानमा आक्रमण गरिएको इजरायलको भनाइ छ ।

इरानको सरकारी सञ्चारमाध्यमका अनुसार राजधानी तेहरान, तबरीज र इस्फहानसहितका सहरमा लगातार विस्फोटका आवाज सुनिएका छन् । कराज सहर नजिक पनि विस्फोट भएको छ । घटनापछि तेहरान अन्तर्राष्ट्रिय विमानस्थलमा उडानहरू अर्को आदेश नभएसम्मका लागि रोकिएका छन् ।

यसैबीच, इरानको इस्लामिक रिभोल्युसनरी गार्ड कोर (आईआरजीसी)ले पछिल्ला घटनालाई ‘निरन्तर आक्रमणको सुरुवात’ भन्दै कडा चेतावनी दिएको छ । इजरायलले आक्रमण दोहोर्‍याए त्यसको जवाफ अझ ठूलो स्तरमा दिने र यसमा क्षेत्रका अमेरिकी तथा इजरायली अड्डाहरू पनि लक्ष्य बन्न सक्ने चेतावनी इरानले दिएको हो ।

इरानले अमेरिका र इजरायलले युद्धविराम सम्झौता पालना नगरेको आरोपसमेत लगाएको छ । अप्रिलको सुरुवातमा लागू भएको भनिएको युद्धविराम बारम्बार उल्लंघन भइरहेको दुवै पक्षको आरोप प्रत्यारोपबीच तनाव थप बढेको छ ।

यसैबीच, लेबनानको राजधानी बेरुतमा इजरायली आक्रमणपछि इरानमा सरकार समर्थक प्रदर्शनहरू पनि भएका छन् । प्रदर्शनकारीहरूले इरान र हिज्बुल्लाहको झण्डा बोकेर सडकमा प्रदर्शन गरेका छन् । क्षेत्रीय तनाव निरन्तर बढ्दै जाँदा इरान–इजरायल सम्बन्ध थप जटिल बन्दै गएको छ ।