सप्तकोशीमा पानीबोट दुर्घटना हुँदा तीन जनाको मृत्यु, तीन बेपत्ता

विराटनगर । सप्तकोशी नदीमा पानी बोट दुर्घटना हुँदा तीन जनाको मृत्यु भएको छ । तीन जना बेपत्ता भएका छन् । धनकुटाको साँगुरीगढी गाउँपालिका–१० स्थित त्रिवेणी नजिकै सप्तकोशी नदीमा पानीबोट दुर्घटना हुँदा तीन जनाको मृत्यु भएको हो । तीन जना बेपत्ता भएका छन् ।

भोजपुरको हतुवागढी गाउँपालिका–९ कोप्चेबाट चालकसहित १५ जना यात्रु बोकेर सुनसरीको चतरातर्फ जाँदै गरेको ‘ओबीएम’ कम्पनीको पानीबोटको ब्रेक फेल भई दुर्घटना भएको थियो । जेटबोटमा १२ जनाले टिकट काटेका थिए । अन्यलाई चालकले चढाएका थिए ।
प्रहरीका अनुसार सुनसरीको बराहक्षेत्र नगरपालिका–१ बस्ने अन्दाजी ५२ वर्षीया लीला राई, अन्दाजी ६–७ वर्षीया एक बालिका र अन्दाजी ५०–५५ वर्षका एक पुरुषको मृत्यु भएको हो ।

दुर्घटनामा परी अन्य तीन जना नदीमा बेपत्ता भएका छन् । झापाको कन्काई नगरपालिका–४ का ७ वर्षीय शिवक मगर, सुनसरी बराहक्षेत्र नगरपालिका–१ की २१ वर्षीया प्रमिला मगर र सोही ठाउँकी २२ वर्षीया मनु राई बेपत्ता रहेको जिल्ला प्रहरी कार्यालय धनकुटाले जनाएको छ । उनीहरूको खोजी कार्य तीव्र पारिएको छ ।

दुर्घटनामा भोजपुर हतुवागढी गाउँपालिका–४ का ३१ वर्षीय मोहन सुनार घाइते भएका छन् । उनको अवस्था सामान्य छ ।
प्रहरीका अनुसार त्रिबेणीदेखि थोरै तल नदीमा बोट स्टार्ट बन्द भएको थियो । त्यसपछि स्टार्ट भएन् । नदीमा बग्दै आउने क्रममा किनारामा ठोक्किएर दुर्घटना भएको थियो । बोटमा सवार अन्य यात्रुहरू मध्ये केही आफै पौडी खेलेर निस्कीएका थिए । केहीलाई स्थानीय र प्रहरीको सहयोगमा निकालिएको थियो ।

घटनापछि बोट चालक सुनसरी बराहक्षेत्र–१ का २४ वर्षीय सुमन मगरलाई प्रहरी चौकी बराहक्षेत्रले नियन्त्रणमा लिएको छ ।

जिल्ला प्रहरी कार्यालय धनकुटाबाट प्रहरी उपरीक्षक नारायण रञ्जितकारले घटनाको अनुसन्धान भइरहेको बताए । प्रहरीका अनुसार सप्तकोशी नदीमा यात्रु बोक्ने ति बोट दर्ता बिना नै सञ्चालनमा रहेको पाइएको छ ।