पर्यटक भिसा दुरुपयोग गरी धार्मिक गतिविधिमा संलग्न २४ कोरियाली नागरिक निष्कासित

विराटनगर । पर्यटक भिसाको दुरुपयोग गरी मोरङमा धार्मिक प्रशिक्षण तथा प्रचारप्रसारमा संलग्न २४ जना दक्षिण कोरियाली नागरिकलाई नेपालबाट निष्कासन गरिएको छ ।

अध्यागमन विभागले उनीहरूको भिसा रद्द गर्दै जनही ५० हजार रुपैयाँ जरिबाना तिराएर ३ वर्षसम्म नेपाल प्रवेशमा प्रतिबन्ध लगाएर निष्कासन गरेकाे हाे ।

सुन्दरहरैँचा–७ स्थित ‘नेपाल न्यू कोभेनेन्ट कलेज’मा धार्मिक गोष्ठी, प्रशिक्षण र दीक्षान्त समारोह सञ्चालन गरिरहेको सूचनाका आधारमा प्रहरीले उनीहरूलाई नियन्त्रणमा लिएको थियो ।

कोरियास्थित ‘लभ नेपाल मिसन’का प्रमुख डा. पार्क गुइ ह्वानसहितको उक्त टोली असोज २० र २१ गते पर्यटक भिसामा नेपाल आएको थियो ।

अनुसन्धानका क्रममा उक्त कलेज सरकारी अनुमतिबिना सञ्चालन भई धार्मिक शिक्षा तथा पास्टर उत्पादनमा सक्रिय रहेको पाइएको छ । पर्यटक भिसामा गर्न नपाइने गतिविधिमा संलग्न भएपछि अध्यागमन कानुनबमोजिम उनीहरूलाई कारबाही गरी देश निकाला गरिएको हो ।