दसैँ अवधिमा कोशीमा सवारी दुर्घटना : २२ जनाको मृत्यु, ७४६ घाइते

विराटनगर । यस वर्षको दसैँको अवधिमा कोशी प्रदेशमा ४१३ स्थानमा सवारी दुर्घटना हुँदा २२ जनाको मृत्यु भएको छ । ३६ जना गम्भीर र ७ सय १० जना सामान्य घाइते भएका छन् ।

नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका अनुसार, घटस्थापनादेखि कोजाग्रत पूर्णिमासम्मको अवधिमा ४१३ दुर्घटना हुँदा १७ पुरुष र दुई बालिकासहित ५ महिलाको मृत्यु भएको हो । यो अघिल्लो वर्षको तुलनामा मृत्यु संख्या कम हो । २०८२ सालको दसैँको अवधिमा २९१ दुर्घटना हुँदा २६ जनाको मृत्यु भएको थियो । ५८ जना गम्भीर र ५०६ जना सामान्य घाइते भएका थिए । यो वर्ष दुर्घटना संख्या बढी छ ।

कार्यालयका निमित्त प्रमुख प्रहरी निरीक्षक विकाश थपलियाका अनुसार प्रदेशका १४ जिल्लामध्ये सबैभन्दा धेरै दुर्घटना मोरङमा भएको छ ।

दसैँभर मोरङमा सबैभन्दा धेरै १ सय ७० वटा दुर्घटना भए । यी दुर्घटनामा ४ जनाको मृत्यु भएको छ भने २ सय ९१ जना घाइते भएका छन् ।

मानवीय क्षतिको हिसाबले सुनसरी अगाडि छ । सुनसरीमा ८७ वटा दुर्घटना हुँदा ८ पुरुष र २ महिला गरी १० जनाको मृत्यु भएको छ । सुनसरीमा १ सय ५६ जना घाइते भएका छन् ।

झापामा ८४ वटा दुर्घटना हुँदा ४ जनाको मृत्यु भयो । १ सय ३९ जना घाइते भएका छन् । उदयपुरमा ३३ वटा दुर्घटना हुँदा ४ जनाको ज्यान गएको छ । ८९ जना घाइते भएका छन् ।

पहाडी जिल्लातर्फ इलाममा १० दुर्घटनामा २० जना घाइते भएका छन् । पाँचथरमा ७ दुर्घटनामा १२ जना, खोटाङमा ७ दुर्घटनामा ९ जना, ओखलढुंगामा ५ दुर्घटनामा ७ जना, संखुवासभामा ४ दुर्घटनामा ६ जना र ताप्लेजुङमा ३ दुर्घटनामा ६ जना घाइते भएका छन् ।

दसैँको अवधिमा ट्राफिक नियम उल्लङ्घन गर्ने सवारीसाधनहरूमाथि पनि प्रहरीले कडाइ गरेको थियो । नियम मिच्ने २ हजार ४ सय ५७ वटा सवारीसाधनलाई कारबाही गरेको छ । ति सवारीबाट जरिबाना बापत २५ लाख २९ हजार रुपैयाँ राजस्व संकलन भएको छ ।