भारततर्फ आउँदै गरेको तेल ट्यांकरमाथि आक्रमण

काठमाडौं । मध्यपूर्वमा बढ्दो तनावका बीच विश्वकै महत्वपूर्ण समुद्री मार्ग मानिने स्ट्रेट अफ होर्मुजमा भारततर्फ आउँदै गरेको एक तेल ट्यांकरमाथि आक्रमण भएको छ ।

थाइल्याण्डको स्वामित्वमा रहेको ‘मयूरी नारी’ नामक जहाज ओमानको समुद्री तटबाट करिब ११ नटिकल माइल उत्तरमा अज्ञात प्रोजेक्टाइल प्रहार भएपछि आगलागी भएको अन्तर्राष्ट्रिय सञ्चारमाध्यमहरूले जनाएका छन् । उक्त जहाज संयुक्त अरब इमिरेट्सको अबुधाबीस्थित खलिफा पोर्टबाट भारतको गुजराततर्फ इन्धन बोकेर आउँदै गरेको थियो ।

आक्रमणपछि जहाजमा ठूलो आगलागी भएको र केही समयका लागि जहाजको सञ्चालन अवरुद्ध भएको बताइएको छ । घटनाप्रति भारत सरकारले चिन्ता व्यक्त गर्दै समुद्री सुरक्षाबारे गम्भीर चासो देखाएको छ ।

स्ट्रेट अफ होर्मुज विश्वको सबैभन्दा व्यस्त तेल ढुवानी मार्गमध्ये एक हो । करिब ३३ किलोमिटर चौडाइ भएको यो समुद्री मार्गमा जहाज चल्न मिल्ने भाग करिब ११ किलोमिटर मात्र भएकाले यहाँको सुरक्षा संवेदनशील मानिन्छ । भारतसहित धेरै देशहरूले साउदी अरब, इराक, कुवेत र यूएईबाट कच्चा तेल तथा ग्यास यही मार्ग हुँदै आयात गर्ने गर्छन् ।

मध्यपूर्वमा अमेरिका र इजरायलसँगको तनावपछि इरानले तेल आपूर्तिको मार्ग बन्द गर्न सक्ने चेतावनी दिएसँगै यस क्षेत्रमा आक्रमणको जोखिम बढेको छ । पछिल्लो समय ठूला सिपिङ कम्पनीहरूले होर्मुज मार्ग प्रयोग गर्न हिच्किचाउन थालेका छन् । जसका कारण विश्व बजारमा तेल आपूर्तिमा असर परेको छ ।

यसैबीच, अन्तर्राष्ट्रिय बजारमा कच्चा तेलको मूल्य प्रति ब्यारेल १०० डलर नाघिसकेको छ । इन्धन आपूर्ति अस्थिर बन्दै जाँदा भारतलगायत धेरै देशमा पेट्रोलियम पदार्थको मूल्य बढ्ने संकेत देखिएको छ ।