कांग्रेस मोरङको अधिवेशन : पुस्तान्तरणको एजेण्डासहित राईकाे उम्मेदवारी घाेषणा

विराटनगर । प्रजातान्त्रिक आन्दोलनको उर्वर भूमि मोरङमा नेपाली कांग्रेसको आसन्न जिल्ला अधिवेशनका लागि चुनावी सरगर्मी सुरु भएकाे छ । मंसिर अन्तिम साता कांग्रेसकाे जिल्ला अधिवेशन गर्ने तयारी छ । अधिवेशनको मिती नजिकिँदै गर्दा बौद्धिक छवि बनाएका युवा नेता सूयर्माराज राईले जिल्ला सभापतिमा उम्मेदवारी घोषणा गरेका छन् । कोशी प्रदेशसभाका पूर्वप्रमुख सचेतकसमेत रहेका राईले सभापति गगन थापा र वरिष्ठ उपसभापति विश्वप्रकाश शर्माले सुरु गरेको ‘वैचारिक रूपान्तरण र पुस्तान्तरण’को एजेण्डासहित जिल्ला सभापतिमा उम्मेदवारी घोषणा गरेका हुन् ।

कांग्रेसको उर्भर भूमि मोरङ सभापतिमा वर्तमान जिल्ला उपसभापति भक्तिनाथ माझी, सचिव मोदराज घिमिरे, ललित श्रेष्ठ, संविधानसभा सदस्य दीलिप गच्छदार र यदु विष्ट पनि उम्मेदवारी दिने तयारीमा छन् । यद्धपि उनीहरुले औपचारिक घोषणा गरेका छैनन् ।

नेविसंघ हुँदै पार्टी राजनीतिमा आएका राईले उम्मेदवारी घोषणा गरेका हुन् । ‘राजनीति सत्ताकै लागि गरिन्छ, तर विचार र सिद्धान्तविहीन सत्ता राजनीतिले पार्टी संगठनलाई भित्रभित्रै खोक्रो बनाउँछ,’ राई भन्छन्,‘कांग्रेसलाई अब ‘प्रिन्सिपल र पावर’सँगै जोडेर लैजानुपर्ने बेला आएको छ । लामो समय अवसर पाएकाहरूलाई सम्मान गर्दै नयाँ सोच र योगदान भएका साथीहरूलाई नेतृत्वमा ल्याउन ‘कोर्स करेक्सन’ अनिवार्य छ ।’

कानेपोखरी–५ स्थायी ठेगाना भएका राई नेपाली साहित्य र समाजशास्त्रमा स्नातकोत्तर गरेका छन् । चार वर्ष प्राध्यापनसमेत गरेका उनी २०७४ को निर्वाचनमा मोरङ क्षेत्र नम्बर ३ (१) बाट प्रदेशसभा सदस्यमा प्रत्यक्ष निर्वाचित भएका थिए । कोशी प्रदेशसभामा सचेतक र प्रमुख सचेतकको जिम्मेवारीमा समेत काम गरेका थिए ।