शक्तिशाली ‘अर्नब’को प्रभाव कोशीदेखि सुदूरपश्चिमसम्म, तीन दिन सतर्कता अपनाउन आग्रह

विराटनगर । बंगालको खाडीमा विकसित शक्तिशाली चक्रवात ‘अर्नब’को प्रभाव कोशीदेखि सुदूरपश्चिम प्रदेशसम्म पर्ने देखिएकाे छ । तराई र पहाडमा वर्षा र हिमाली क्षेत्रमा हिमपातकाे सम्भावना देखिएपछि सरकारले तीन दिनसम्म यात्रा नगर्न र उच्च सतर्कता अपनाउन आग्रह गरेको छ । मौसम प्रतिकूल हुने सम्भावनालाई मध्यनजर गर्दै बिहीबारदेखि शनिबारसम्म सुरक्षा निकायहरूलाई ‘हाई अलर्ट’मा राखिएको छ ।

मौसम पूर्वानुमान महाशाखाका अनुसार बुधबार रातिदेखि नेपालमा चक्रवातको असर सुरु भई शुक्रबार र शनिबार यसको प्रभाव देशभर फैलिनेछ । यस अवधिमा कोशी, मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशका विभिन्न स्थानमा मेघगर्जनसहित वर्षा तथा उच्च हिमाली र पहाडी भूभागमा भारी वर्षा, हिमपात, हिमआँधी र हिमपहिरोको उच्च जोखिम रहेको छ ।

जोखिमलाई दृष्टिगत गर्दै अध्यागमन विभागले कात्तिक १२, १३ र १४ गतेका लागि पदयात्रामा जान पूर्ण रोक लगाएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले पर्यटक, पदयात्री तथा सर्वसाधारणलाई उच्च पहाडी तथा हिमाली क्षेत्रमा नजान र अत्यावश्यक कामबाहेक सडक तथा हवाई यात्रा नगर्न अनुरोध गरेको छ । यसअघि नै पदयात्रामा निस्किसकेकाहरूलाई मौसम अनुकूल नभएसम्म सुरक्षित स्थानमै रहन भनिएको छ ।

प्राधिकरणले नदी किनार र पहिरोको जोखिम रहेका क्षेत्रमा विशेष सावधानी अपनाउन आग्रह गरेको छ । मौसमसम्बन्धी जानकारीका लागि हटलाइन ११५५ तथा कुनै पनि आपत्कालीन उद्धारका लागि नेपाल प्रहरी (१००), सशस्त्र प्रहरी (१११४), पर्यटक प्रहरी (११४४) वा आपत्कालीन कार्यसञ्चालन केन्द्र (१२३४) मा सम्पर्क गर्न सकिनेछ ।