ट्रम्प र मादुराेबीच तनाव, सीमा क्षेत्रबाट अमेरिकाले कब्जा गर्याे ट्याङ्कर

काठमाडौं । भेनेजुएलाको सीमा क्षेत्रबाट अमेरिकाले तेल ट्यांकर कब्जा गरेको छ । याे खुलासा अमेरिकी राष्ट्रपति डोनाल्ड ट्रम्पले गरेका हुन् ।

ह्वाइट हाउसमा पत्रकारहरूसँग ट्रम्पले भने, “हामीले भर्खरै भेनेजुएलाको तटमा एउटा ठूलो ट्यांकर कब्जा गरेका छौं । वास्तवमा अहिलेसम्म कब्जा गरिएकामध्ये सबैभन्दा ठूलो ।”

महान्यायाधिवक्ता पाम बोन्डीले सामाजिक संजाल  एक्समा एक भिडियो पोस्ट गरिन्, जसमा अमेरिकी सेना ट्यांकरमा चढेको जस्तो देखिन्थ्यो ।

यो घोषणाले ट्रम्प प्रशासन र भेनेजुएलाका राष्ट्रपति निकोलस मादुरोको शासनबीचको पछिल्लो तनावलाई संकेत गर्ने बताइएको छ । भेनेजुएलाले भने अमेरिकाले अन्तर्राष्ट्रिय समुद्री डकैती गरेको आरोप लगाएको छ ।

केही दिनअघि अमेरिकी समाचार संस्था पोलिटिकोसँगको अन्तर्वार्तामा ट्रम्पले मादुरोको दिनगन्ति सुरु भएको  भनेका थिए । पछिल्लाे समय मादुराे र ट्रम्पबीच सार्वजनिक रुपमा विवाद चलिरहेकाे छ ।