हमासले बन्धक नछाडे युद्ध सुरु हुने इजरायलको चेतावनी

काठमाडौं ।हमासले बन्दी रिहाई रोक्ने घोषणा गरेपछि इजरायली प्रधानमन्त्री बेन्जामिन नेतान्याहुले पुनः युद्ध सुरु गर्ने चेतावनी दिएका छन् ।

इजरायलले युद्धविराम सम्झौताको बेलमा पनि आक्रमण गरेको भन्दै हमासले बन्दी रिहाई रोक्ने घोषणा गरेको थियो । इजरायली प्रधानमन्त्री नेतान्याहुले शनिबार बन्दी रिहाई नगरे पुनः युद्ध सुरु गर्ने चेतावनी दिएका हुन् ।

‘यदि हमासले शनिबार दिउँसोसम्म हाम्रा बन्धकहरूलाई रिहा गरेन भने, हामी गाजामा युद्धविराम समाप्त गर्नेछौँ र फेरि लडाइँ सुरु गर्नेछौँ।’ नेतान्याहुले भने ।

यसअघि अमेरिकी राष्ट्रपति डोनाल्ड ट्रम्पले पनि हमासलाई बन्दीको रिहाइ नरोक्न चेतावनी दिएका थिए ।

नेतान्याहुले शनिबारसम्ममा बाँकी रहेका सबै बन्धकहरूको रिहाइका लागि आग्रह गरेका छन् ।

हमासले सोमबार इजरायलले युद्धविराम सम्झौता उल्लङ्घन गरिरहेको कारणले बन्धकहरूको रिहाइ रोकिएको बताएको थियो ।

हमास र इजरायलबिचको युद्धविराम सम्झौता जनवरी १९ मा लागू भएको थियो । हमासले त्यसयता १६ इजरायली र पाँच थाई बन्धकहरूलाई रिहा गरिसकेको छ । इजरायलले ५६६ प्यालेस्टिनी कैदीहरूलाई रिहा गरेको छ ।