उदयपुरमा प्याराग्लाइडिङ दुर्घटना हुँदा जापानका नागरिकको मृत्यु

विराटनगर । उदयपुरमा प्याराग्लाइडिङ दुर्घटना हुँदा एक जना विदेशी नागरिकको मृत्यु भएको छ ।

प्याराग्लाइडिङ अवतरणका क्रममा दुर्घटनामा हुँदा ७२ वर्षीय जापानीज नागरिक काजी ताकासीको मृत्यु भएको हो ।

बेलका नगरपालिका–८ बोक्ताङ डाँडामा भएको प्याराग्लाइडिङ गरेर उडेका उनी मैदानमा ‘ल्याण्ड’ गर्ने क्रममा घाइते भएका थिए । उनलाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको थियो । उपचारका क्रममा उनको बुधबार साँझ मृत्यु भएको थियो ।

उदयपुर प्रहरी प्रमुख एसपी हरिहरनाथ योगीका अनुसार शवलाई पोस्टमार्टमका लागि टिचिङ अस्पताल काठमाडौं पठाइएको छ ।