मजदुरबाट रोजगारदाता बनिन सीता (भिडियाे)

विराटनगर । मोरङको बेलबारी नगरपालिका– १ की ५६ वर्षीय सीता बराइलीको जीवनको पाँच दशक दुःखैदुःखमा बित्यो ।

दुई छाक जुटाउनका लागि मुस्किल भएपछि उनी परिवारसहित पहाड घर भोजपुरबाट भारतको मेघालयसम्म पुगिन् । मेघालयमा उनले सामान्य होटल चलाइन, उनका श्रीमानले कोइला काट्ने काम गरे ।

जीवनमा अनेक कष्ट सहेकी सीता चार–पाँच वर्षयता सन्तोषले बसेकी छन् । उनको परिवार पनि खुसी छ ।

परिवारको खुसीको यात्रामा सीतालाई जीवन विकास लघुवित्त वित्तीय संस्थाले सहयोग गरेको छ । सीताका छोरा साजन र सुनिल बेलबारी बजारमा न्यु बराइली ज्वेलर्स तथा कारखाना सञ्चालन गर्छन् ।

साजन सुनका कालिगढ हुन् । उनले काठमाडौँमा काम सिकेका थिए । कोरोना महामारीका बेला घर फर्किएका उनले केही समय अरुकै पसलमा काम गरे ।
आफ्नो पसल सञ्चालन गर्ने रहर भएपनि लगानी गर्ने पैसा थिएन । व्यवसाय सञ्चालन गर्न सीतालाई जीवन विकासले सुरुमा तीन लाख रुपैयाँ ऋण सहयोग गर्यो । पुँजी जुटेपछि साजनले सुनको सामग्री बनाउने कारखाना खोले । भाइलाई पनि कारखानाको काम सिकाए ।

कारखानासँगै अहिले ज्वेलर्स पनि सञ्चालन गर्छन् । सुन पसल र कारखानामा सात जनालाई रोजगारी दिएका छन् । आफू पनि स्वरोजगार भएका छन् । कारखानामा गहना बनाउनका लागि धरान इटहरी दमकलगायत पूर्वको बजारबाट अर्डर आउने साजनले बताए ।

सानो लगानीबाट सुरु भएको व्यवसायलाई साजन र सुनिलले विस्तार गरिरहेका छन् । ‘पहिलेदेखि नै संघर्ष गरिरहेका छौ, जीवन विकासमा जोडिएपछि सहज भयो,’ साजनले भने,‘व्यवसाय सुरु गरेपछि अहिले ६–७ जना काम गर्छाैँ ।’