हिजबुल्लाहको ड्रोन आक्रमणमा ४ इजरायली सैनिककाे मृत्यु

एजेन्सी । मध्य–उत्तरी इजरायलको सेनाको क्याम्पमा हिजबुल्लाहले ड्रोन आक्रमण गरेको छ । यो आक्रमण युद्ध सुरु भएको गत अक्टोबर यताकै ठूलो भएको सीएनएनले जनाएको छ ।

हिजबुल्लाहको ड्रोन आक्रमणमा चार इजरायली सैनिक मारिएका छन् । ६० जना घाइते भएका छन् ।

इजरायल डिफेन्स फोर्स (आईडीएफ) का अनुसार हिजबुल्लाहले प्रक्षेपण गरिएको मानवरहित ड्रोन लेबनानी सीमाबाट करिब ४० माईल टाढा रहेको तेल अवीवको उत्तरमा रहेको बिन्यामिना नजिकै रहेको सेनाको बेसमा ठोक्किएको थियो ।

लेबनानमा आधारित लडाकु समूहले लेबनानमा बिहीबार इजरायली हमलाको जवाफमा आक्रमण भएको बताएको छ । हिजबुल्लाहले दक्षिणी लेबनानमा तैनाथ इजरायल डिफेन्स फोर्सको इन्फन्ट्री युनिट गोलानी ब्रिगेडलाई निशाना बनाएको बताएको छ ।

हिजबुल्लाहले ड्रोन आक्रमण गर्दा कुनै खतराको संकेत बजेको थिएन । इजरायली सेनाका प्रवक्ता ड्यानियल हगारीले हेजबुल्लाहद्वारा प्रक्षेपण गरिएको ड्रोन आइतवार इजरायलमा अलर्ट बिना नै कसरी प्रवेश गर्यो भन्ने कुराको खोजी गर्ने बताए । हमला भएको बिन्यामिना नजिकैको सैनिक शिविरबाट एक भिडियो सन्देशमा हागारीले भने, ‘हामी घटनाबाट सिक्ने र अनुसन्धान गर्नेछौं, कसरी एक यूएभी बेसमा अलर्ट बिना प्रवेश गर्यो।’