दुई नाबालिका हत्या प्रकरण

विराटनगर । मोरङको सुन्दरहरैँचा नगरपालिका–७ स्थित केरा बगानभित्र दिदीबहिनी मृत फेला परेको घटना रहस्यमय बन्दै गएको छ । घरबाट छाेरीलाई  लिएर गएकी आमा बेपत्ता भएका कारण घटना थप रहस्यमय भएकाे हाे ।

शुक्रबार राति श्रीमानसँग झगडापछि दुई छोरी लिएर हिडेकी महिला अझै बेपत्ता छिन् । दुई छोरीको शव भने विष खुवाएर मारेको अवस्थामा केराबारीमा भेटिएको थियो । आमाको अवस्था भने अझै अज्ञात रहेको प्रहरीले बताएको छ ।

मोरङको सुन्दरहरैँचा नगरपालिका–७ बस्दै आएका धनकुटाको पाख्रिबास नगरपालिका–४ डिकुरेका अर्जुन कार्कीका नाबालिका छोरीहरु १ वर्षीया आइका र ३ वर्षीया अर्पणा कार्की शनिबार स्थानीय नारायण न्यौपानेको केराघारीभित्र मृत फेला परेका थिए । श्रीमान अर्जुनसँगको झगडापछि उनीहरुलाई शुक्रबार राति आमा अस्मिताले लिएर गएकी थिइन् ।

पत्नी र २ छोरीसहित सुन्दरहरैँचा–७ मालती टोलस्थित दिदी सीता रेग्मीको घरमा अर्जुन बस्दै आएका थिए । सोही स्थानमा उनीहरुले नयाँ घर पनि बनाउँदै थिए ।

शुक्रबार निर्माणाधीन घरमा पानी नहालेको विषयमा दुई जनाबीच विवाद भएको थियो । त्यसपछि २ जना नाबालिका छोरीलाई लिएर अस्मिता शुक्रबार साँझदेखि हिँडेकी थिइन् । नाबालिकाहरु भोलिपल्ट मृत फेला परेका हुन् ।

प्रहरीका अनुसार अर्जुन इटहरी–भोजपुर चल्ने ट्याक्सी चलाउँछन् । अर्जुनले भोजपुरबाट आउँदा माछा पनि लिएर आएका थिए ।

‘पत्नीसँग विवाद भएपछि माथि चढेर म माछा पकाउन थालें । पकाएर खान बोलाउँदा उनी (अस्मिता) थिइनन् । छोरीहरु पनि लिएर गइछन्,’ उनको भनाइ उद्रित गर्दै प्रहरीले भन्यो, ‘त्यसपछि फोन गर्दा उठेन । रातभर खोजी गरियो । तर, पत्ता लगाउन सकिएन ।’

प्रहरीका अनुसार अस्मिताले ‘तेरा छोरी मारिदिइसकें, म पनि मर्छु’ भनेर मोबाइलमा म्यासेज पठाएको अर्जुनले बताएका छन् । अस्मिताको म्यासेज पठाएको भनिएको मोबाइल नाबालिकाको शवनजिकै फेला परेको थियो ।

कल डिटेल्स रेकर्ड परीक्षणका लागि पठाइएको र रिपोर्ट आइसकेपछि प्रष्ट हुने मोरङ प्रहरी प्रमुख एसपी नवराज कार्कीले बताए । घटनाका सम्बन्धमा थप अनुसन्धान भइरहेको जानकारी उनले दिए । एसपी कार्कीका अनुसार घटना भएयता घटनास्थल आसपास र जंगलमा नियमित रूपमा खोजतलास भइरहेको छ ।