औषधीय गुणले भरिपूर्ण तेजपात यसरी प्रयाेग गर्नुहाेस्

विराटनगर । तेजपात स्वाद र बास्नाका लागि प्रयोग गरिन्छ । चिया र तरकारीमा स्वादको लागि मसलाको रुपमा प्रयोग गर्ने चलन पुरानै हो । तेजपात स्वास्थ्यको दृष्टिले पनि निकै फाइदाजनक मानिन्छ ।

तेजपातमा पोषक तत्व र खनिज हुन्छ । तेजपातमा भिटामिन ए, भिटामिन सी, आइरन, पोटासियम, क्याल्सियम र म्याग्नेसियम उच्च मात्रामा पाइन्छ । यसमा इन्जाइमहरू पनि हुन्छन्,जसले प्रोटिनलाई तोड्न र पाचन सुधार गर्न मद्दत गर्छ ।

 कसरी गर्ने उपयोग ?

तेजपातलाई स्वादको लागि मात्र नभई औषधिको रूपमा पनि प्रयोग गरिन्छ । यसलाई ज्वरो, रुघाखोकी, अपच, कब्जियत जस्ता समस्यामा औषधिको रुपमा प्रयोग गरिन्छ । छालासम्बन्धी रोग र कपालका लागि पनि यो उपयोगी हुन्छ । घरमा झिंगा र साङ्ला हटाउन पनि प्रयोग हुन्छ ।

तेजपात मधुमेहमा पनि प्रभावकारी देखिएको छ । सन् २०१६ मा जर्नल अफ बायोकेमिकल न्यूट्रिसनमा प्रकाशित शोधमा टाइप २ मधुमेहबाट पीडित व्यक्तिले तेजपात खानु उपयोगी हुने उल्लेख गरिएको छ । यसले शरीरमा खराब कोलेस्टेरोल र अनावश्यक तरल पदार्थलाई घटाएर गुड कोलेस्टेरोल सुधार गर्न मद्दत गर्छ ।

यसमा हुने भिटामिन सीले दाँत र गिजालाई स्वस्थ राख्न मद्दत गर्छ र दाँत दुखाइबाट पनि राहत दिन्छ । तेजपातमा भिटामिन ए र सीका साथै फोलिक एसिड पनि हुन्छ । यसले पेटसम्बन्धी समस्या मुक्त गर्न मद्दत गर्छ । कब्जियत र एसिडिटीको समस्यामा तेजपातले औषधिकै काम गर्छ ।

रगत पातलो गर्ने औषधि खाइरहेका व्यक्तिले तेजपात प्रयोग गर्न मिल्दैन । तेजपातको अत्याधिक प्रयोगले शरीर सुन्निने समस्या हुन्छ ।

तेजपातलाई बिहान र बेलुका खान उपयुक्त हुन्छ । मधुमेह, मोटोपन, कोलेस्टेरोलको लागि तेजपात बिहान खाली पेटमा चिया बनाएर वा पाउडर बनाएर प्रयोग गर्न सकिन्छ ।

खानासँगै पकाउँदा तेजपातको औषधीय गुण नष्ट हुन्छ । त्यसैले यसलाई खानेकुरा आधा पाकिसकेपछि वा पाक्न लागेपछि माथिबाट हाल्दा राम्रो हुन्छ ।