गोल्डेन बुटको एक्लो दाबेदार मेस्सी

काठमाडौं । फिफा विश्वकप २०२६ को दोस्रो सेमिफाइनलमा इङ्गल्यान्ड विरुद्ध २–१ को रोमाञ्चक जित निकाल्दै अर्जेन्टिना फाइनलमा प्रवेश गरेको छ । यो जितसँगै कप्तान लियोनेल मेस्सी जारी प्रतियोगिताको गोल्डेन बुट दौडमा शीर्ष स्थानमा उक्लिएका छन् ।

इङ्गल्यान्डविरुद्ध मेस्सीले व्यक्तिगत गोल गर्न नसके पनि टोलीका लागि दुई वटा निर्णायक गोलको असिस्ट गरेका थिए । उनको उत्कृष्ट प्रदर्शनको मद्दतले अर्जेन्टिनाले इङ्गल्यान्डको चुनौती पन्छाउँदै उपाधि नजिक पुग्न सफल भएको हो ।ृ

यसअघि गोल्डेन बुटको दौडमा फ्रान्सका स्टार खेलाडी किलियन एम्बाप्पे र लियोनेल मेस्सी ८–८ गोलका साथ बराबरीमा थिए । तर, फिफाको नियम अनुसार समान गोल भएको अवस्थामा बढी असिस्ट गर्ने खेलाडीलाई प्राथमिकता दिइन्छ ।

यही नियमका कारण ४ असिस्ट पुर्‍याएका मेस्सी पहिलो स्थानमा उक्लिएका हुन् । ३ असिस्ट गरेका एम्बाप्पे दोस्रो स्थानमा खुम्चिएका छन् ।

३९ वर्षीय मेस्सीका लागि यो विश्वकप करियरकै एक महत्वपूर्ण मोड साबित भएको छ । उनले समूह चरणमा अल्जेरिया विरुद्ध ऐतिहासिक ह्याट्रिक प्रहार गरेका थिए, जुन उनको विश्वकप करियरकै पहिलो ह्याट्रिक हो । जोर्डन विरुद्धको अर्को खेलमा उनले लामो दूरीबाट प्रहार गरेको फ्रिकिक गोललाई यस प्रतियोगिताकै उत्कृष्ट मध्येको एक मानिएको छ ।

आइतबार हुने फाइनल खेलमा मेस्सीको अगाडि गोल्डेन बुटसँगै आफ्नो टोलीलाई लगातार दोस्रो पटक विश्वकपको उपाधि जिताउने  अवसर छ ।