तीन हजार लगानीबाट व्यापारको सुरुवात, आम्दानी हुन्छ मासिक २ लाख

तनहुँ । तनहुँको आँबुखैरेनी गाउँपालिका–३ की २५ वर्षीया सरिश्मा गुरुङ फूलको व्यापार गर्छिन् । विसं २०७७ मा तीन हजार पाँच सय लगानी गरेर उनले फूलको व्यापार सुरु गरेकी थिइन् ।

फूलको व्यापार विस्तार गर्दै गुरुङले सभा–सेमिनार,पास्नी, विवाहलगायतका उत्सवको सजावट गर्दै आइरहेकी छन् । उनी मासिक दुई लाखसम्म आम्दानी गर्छिन् ।

गुरुङका अनुसार राम्रो कार्यक्रम भएमा सिजनमा महिनामै २० लाखसम्मको कारोबार हुन्छ । अन्य समयमा मासिक आठ–नौ लाखसम्म कारोबार हुने गरेको छ । खर्च कटाएर मासिक करिब दुई लाख बचत हुने उनले बताइन् ।

‘पोखरा र काठमाडौँमा काम भइरहेको छ । ग्राहकलाई थप सहजता दिन काठमाडौँमा नयाँ शाखा खोल्ने तयारी गरेका छौँ’, गुरुङले भनिन् ।

अब फूल व्यवसायलाई अझ व्यवस्थित बनाउन नर्सरी स्थापना गर्ने तयारी गरेको उनले जानकारी दिइन् । ‘व्यवसाय विस्तारका लागि जग्गा खोजी भइरहेको छ,’ उनले भनिन्,‘फूल तथा बिरुवा उत्पादन र बिक्री बढाँउछौं ।’