विराटमा क्यान्सर सर्भाइभरका लागि परामर्श तालिम

विराटनगर ।  इस्टर्न क्यान्सर सर्भाइभर सपोर्ट ग्रुपले विराट क्यान्सर इन्स्टिच्यूटमा क्यान्सर केयर सम्बन्धी परामर्श तालिमको आयोजना गरेको छ ।

मोरङ र सुनसरीका क्यान्सर सर्भाइभरलाई भेला गरेर तालिमको आयोजना गरेको हो ।

तालिममा विराट मेडिकल कलेज टिचिङ हस्पिटलका प्रमुख कार्यकारी अधिकृत डेनिस कार्कीले विराटमा क्यान्सरको उपचारका लागि नयाँ प्रविधि हाइपेक सञ्चालनमा आएको बताए ।   नयाँ प्रविधिले तेस्रो, चौथो स्टेजको क्यान्सरको उपचार गर्न पनि सहज हुने उनले बताए ।

हस्पिटलका उपाध्यक्ष डा. निकिता कार्कीले पेट सिटि सञ्चालनको तयारी गरिरहेको जानकारी दिए ।

तालिममा डा. सुलभ सापकोटाले क्यान्सरका विरामीलाई हेरचाह गर्ने तौरतरिका सिकाएका थिए । कार्यक्रममा अंकोलोजी सर्जन डा. शिवराज शर्माले विरामीलाई नेपाल सरकारले दिने सहयोगमा समस्या रहने गरेको उल्लेख गर्दै त्यसका लागि सर्भाइभरहरुको दबाब मुलक भूमिकाको खाँचो रहेको बताए ।

साइको सोसल काउन्सिलर तुलसा कार्कीले नयाँ विरामीलाई परामर्श गर्ने तरिका बारे प्रशिक्षण दिइन् । कार्यक्रमका संयोजक एवं क्यान्सर सर्भाइभर कमल पौडेलले सर्भाइभरहरुको सशक्तिकरणका लागि कार्यक्रम आयोजना गरिएको बताए ।