अररियामा जीवन विकासको स्वास्थ्य शिविर

विराटनगर । जीवन विकास सामुदायिक अस्पताल तथा टेक्निकल एजुकेशन फाउण्डेशनले भारतको बिहार राज्यस्थित अररिया जिल्लाको लैलोखर पञ्चायतमा बृहत् निःशुल्क स्वास्थ्य शिविर आयोजना गरेको छ ।

अररियाको लैलोखर पंचायतको सहयोगमा आयोजना गरिएको शिविरमा ५०० बढी सर्वसाधरणले स्वास्थ्य उपचारको लाभ लिएका थिए ।

सीमावर्ती क्षेत्रका नागरिकहरूलाई विशेषज्ञ स्वास्थ्य सेवा पुर्‍याउने उद्देश्यले आयोजित शिविरमा विभिन्न विशेषज्ञ डाक्टरहरूले सेवा प्रदान गरेका थिए ।

शिविरमा फिजिसियन, न्युरो तथा स्नायु रोग, आँखा जाँच, स्त्री तथा प्रसूति रोग, हाडजोर्नी तथा नशा रोग, बालरोग , मुख तथा दाँत रोग सम्बन्धी विशेषज्ञ सेवाहरू उपलब्ध गराइएको थियो ।

उपचारका साथै बिरामीहरूको स्वास्थ्य स्थितिलाई मध्यनजर गर्दै इसिजि तथा भिडियो एक्स–रे सेवा पनि निःशुल्क प्रदान गरिएको थियो ।

शिविरमा सहभागी सेवाग्राहीको निःशुल्क ब्लडप्रेसर र सुगर जाँच पनि गरिनुका साथै आवश्यक स्वास्थ्य परामर्श र औषधिसमेत निःशुल्क वितरण गरिएको थियो ।

आँखा जाँचका क्रममा फेला परेका मोतियाबिन्दु भएका बिरामीहरूलाई थप उपचारका लागि अस्पतालमा विशेष सहुलियत दरमा उपचारको व्यवस्था मिलाइएको अस्पताल प्रशासनले जानकारी दिएको छ ।

घरअगाडि नै विशेषज्ञ चिकित्सक र अत्याधुनिक मेसिनबाट स्वास्थ्य जाँच गराउन पाउँदा लैलोखर पंचायतका बासिन्दाहरूले खुसी व्यक्त गरेका  थिए ।