विश्वकप फुटबल : १२ टाेली नकआउट चरणमा

काठमाडाैं । फिफा विश्वकपको समूह चरणअन्तर्गत तेस्रो चरणका खेलहरू जारी १२ टोलीले नकआउट चरणमा स्थान सुरक्षित गरेका छन् । बिहीबार बिहान समूह चरणका खेलहरू अन्तिम चरणमा पुगेसँगै उपाधि दाबेदार मानिएका केही टोलीले अपेक्षित प्रदर्शन गर्दै नकआउट चरणमा प्रवेश गरेका हुन् ।

हालसम्म मेक्सिको, अमेरिका, जर्मनी, क्यानडा, मोरक्को, कोलम्बिया, ब्राजिल, अर्जेन्टिना, स्विट्जरल्यान्ड, नर्वे, बोस्निया एन्ड हर्जगोभिना तथा फ्रान्स नकआउट चरणमा पुगेका छन् ।  यीमध्ये ११ टोलीले समूहमा विजेता वा उपविजेताका रूपमा नकआउट चरणमा स्थान बनाएका हुन् ।

दक्षिण अमेरिकी शक्ति ब्राजिल र अर्जेन्टिनाले अपेक्षाअनुसार समूह चरण पार गरेका छन् भने युरोपेली टोली जर्मनी, फ्रान्स, स्विट्जरल्यान्ड र नर्वेले पनि आफ्नो चुनौती कायम राखेका छन् । उत्तर अमेरिकी क्षेत्रबाट अमेरिका, मेक्सिको र क्यानडाले नकआउट चरणमा स्थान बनाउँदै प्रभावशाली प्रदर्शन गरेका छन् ।

मोरक्कोले अर्को चरणमा स्थान सुरक्षित गरेको छ । कोलम्बियाले पनि उत्कृष्ट खेल प्रदर्शन गर्दै नकआउट चरणमा प्रवेश गरेकाे छ ।

समूह चरणका बाँकी खेलहरू सम्पन्न भएपछि अन्य टोलीहरूको टुंगो लाग्नेछ । त्यसपछि नकआउट चरणको पूर्ण समीकरण तय हुनेछ । विश्व फुटबलका शक्तिशाली राष्ट्रहरूबीच हुने नकआउट चरणका भिडन्तले प्रतियोगितालाई अझ रोमाञ्चक बनाउने अपेक्षा गरिएको छ ।