क्रिकेटमा नेपालकाे नयाँ इतिहास, जित्यो युनिटी कपकाे उपाधि

काठमाडौं । नेपाली क्रिकेट टिमले नयाँ इतिहास रचेकाे छ । वेस्ट इन्डिजविरुद्धको युनिटी कप टी–२० क्रिकेट शृंखलाको उपाधि जित्दै  नेपालले इतिहास  रचेको हाे  ।

नेपालले सोमबार राति भएको दोस्रो खेलमा ९० रनको जित निकालेसँगै शृंखला अन्तिम खेलअगावै सुनिश्चित गरेको हो । नेपालले दिएको १७३ रनकाे लक्ष्य पछ्याएको वेस्ट इन्डिज जम्मा ८३ रनमा अलआउट भयो । शनिबार पहिलो खेल १९ रनले जितेको थियो ।

नेपाली क्रिकेटले इतिहासमै टेस्ट राष्ट्रविरुद्धको शृंखला जितेको यो पहिलो पटक हो ।

नेपाली टिमले आईसीसीको पूर्ण सदस्य राष्ट्रविरुद्ध खेलेको पहिलो शृंखलामा नै जित निकालेको हो ।

दोस्रो जितसँगै नेपालले तीन खेलको शृंखलामा २–० को अग्रता बनाएको छ ।

यी दुई टिमबीचको अन्तिम तथा तेस्रो खेल मंगलबार हुने तालिका छ ।