एसिया कपमा भारतसँग पाकिस्तान पराजित

काठमाडौं । एसीसी एसिया कपको सुपर–४ मा भारतसँग पाकिस्तान पराजित भएको छ ।

आइतबार युनाइटेड अरब इमिरेट्स (यूएई)को दुबई अन्तर्राष्ट्रिय क्रिकेट मैदानमा पाकिस्तानले प्रस्तुत गरेको १७२ रनको लक्ष्य भारतले १८.५ ओभरमा चार विकेट गुमाएर भेट्याे ।

भारतका ओपनर अभिषेक शर्माले सर्वाधिक ७४ रन बनाए । उनले ३९ बलमा ६ चौका र पाँच छक्का प्रहार गरे । अर्का ओपनर सुभमन गिलले २८ बलमा आठ चौकासहित ४३ रन थपे । यी दुईले पहिलो विकेटका निम्ति ९.५ ओभरमा १०५ रनको साझेदारी गर्दै भारतलाई आक्रामक सुरुआत दिलाएका थिए ।

तिलक वर्माले २० र सञ्जु सामसनले १३ रन थपे ।

पाकिस्तानका ह्यारिस रौफले दुई विकेट लिए । अब्रार अहमेद र फहिम अस्रफले समान एक विकेट हात पारे ।

त्यसअघि, टस हारेर ब्याटिङमा आएको पाकिस्तानले निर्धारित २० ओभरमा पाँच विकेट गुमाएर १७१ रनको योगफल खडा गरेको थियो ।