नेपालले जापानलाई हरायो

काठमाडौं । नेपालले मलेसियामा जारी एसीसी मेन्स यू– १६ इस्ट जोन क्रिकेटमा लगातार दोस्रो जित निकालेको छ । नेपालले दोस्रो खेलमा जापानलाई ९ विकेटले पराजित गरेको हो ।

जापानले दिएको ८१ रनको सामान्य लक्ष्य नेपालले १४.२ ओभरमा १ विकेटको क्षतिमा पूरा गर्‍यो । नेपालका लागि शिवांश बजगाईले ३८ तथा प्रसिद्ध जैसी ३३ रनमा अविजित रहे ।

त्यसअघि बाँयाहाते स्पिनर शुभम खनालले ५ विकेट लिएपछि नेपालले जापानलाई सामान्य योगफलमा अलआउट गरेको थियो ।
टस जितेर पहिले ब्याटिङ गरेको जापान ३४.३ ओभरमा ८० रनमा अलआउट भएको थियो ।

नेपालले पहिलो खेलमा सिंगापुरलाई ५ विकेटले हराएको थियो । लगातार दोस्रो जितपछि दुई खेलमा ४ अंक जोडेर नेपाल समूह ए को शीर्ष स्थानमा छ । नेपालले अब तेस्रो खेलमा २९ जुनमा इन्डोनेसियासँग खेल्नेछ ।