पञ्जाब किङ्सको अपराजित यात्रा

काठमाडौं । पञ्जाब किङ्सले इन्डियन प्रिमियर लिग (आइपिएल) मा अपराजित यात्रा कायम राखेको छ । मंगलबार भएको खेलमा लखनउ सुपर जायन्ट्सलाई आठ विकेटको जित निकाल्दै अपराजित यात्रा कायम राखेको हो । यो नतिजासँगै पञ्जाब दुई खेलबाट चार अंक बटुल्दै शीर्ष दुईमा उक्लिएको छ।

पञ्जाबले यसअघि गुजरात टाइटन्सलाई ११ रनले हराएको थियो । लखनउको भने यो लगातार दोस्रो हार हो । लखनउले तीन खेलबाट दुई अंक जोडेको छ ।

लखनउले दिएको १७२ रनको लक्ष्य पछ्याएको पञ्जाबले १६.२ ओभरमा दुई विकेट गुमाउँदै १७७ रन बनायो । पञ्जाबका लागि प्रभसिमरन सिंह र कप्तान श्रेयस अय्यरको सानदार ब्याटिङ गरे । प्रभसिमरनले सर्वाधिक ६९ रन बनाए । अय्यरले भने लगातार अर्धशतक पूरा गरे । अविजित रहेका उनले ३० बलमा तीन चौका र चार छक्कासहित ५२ रन बनाए । यसअघि उनले गुजरातविरुद्ध अविजित ९७ रन बनाएका थिए ।

नेहाल भाधेरा ४३ रनमा अविजित रहँदा प्रयान्स आर्या आठ रनमा पभिलियन फर्किए । लखनउका दिग्वेश राठीले दुई विकेट लिए। चार ओभर बलिङ गरेका उनले ३० रन खर्चिए।

त्यसअघि भारतरत्न श्री अटल बिहारी वाजपेयी एकना क्रिकेट स्टेडियम लखनउमा टस हारेर पहिला ब्याटिङ थालेको लखनउले निर्धारित २० ओभरमा सात विकेट गुमाउँदै १७१ रन बनाएको थियो ।