विराट गोल्डकपको तयारी पूरा

विराटनगर । विराट गोल्डकप फुटबल प्रतियोगिताको तयारी पूरा भएको छ । सोमबारबाट विराटनगरको सहिद रंगशालामा हुने प्रतियोगिताको तयारी पूरा भएको हो । प्रतियोगितामा २ भारतीयसहित १० टोली सहभागी हुनेछन् ।

विराटनगरको साथ फुटबलको विकास भन्ने नाराका साथ प्रतियोगिता गरिने विराट गोल्डकप फुटबल प्रतियोगिता आयोजक समिति संयोजक नवीन रिजालले बताए ।

उनका अनुसार प्रतियोगिताको टिकटदर २०० रुपैयाँ तोकिएको छ । एउटा टिकट काट्दा दुई हजार रुपैयाँसम्मको फाइदा हुने उनले बताए । गोल्डकपमा काटेको टिकटले विभिन्न क्षेत्रमा छुट प्राप्त गर्न सकिने उनले बताए ।

गोल्डकपको उद्घाटन खेल आयोजक रिजालको मोरङ एफसी र साउथर्न समिति फुटबल क्बल कोलकाताबीच हुनेछ ।

गोल्डकप सम्पन्न गर्न १ करोड ३५ लाख रूपैयाँ खर्च हुने अनुमान छ । प्रतियोगिताको विजेता टिमले ११ लाख र उपविजेतालाई ५ लाख रूपैयाँ नगद पुरस्कार प्राप्त गर्नेछन् ।

उत्कृष्ट प्रशिक्षक, गोलरक्षक र सर्वाधिक गोलकर्ताले १५–१५ हजार रूपैयाँ पाउने छन् । पुरस्कारबापत दैनिक हुने खेलको उत्कृष्ट खेलाडीलाई ११ हजार र सर्वोकृष्ट खेलाडीलाई ५१ हजार प्राप्त गर्नेछन् ।