च्याम्पियन्स ट्रफीको सेमिफाइनल समीकरण पूरा

काठमाडौं । नवौं संस्करणको आईसीसी च्याम्पियन्स ट्रफी क्रिकेटको सेमिफाइनल समीकरण पूरा भएको छ । शनिबार राति दक्षिण अफ्रिकाले इङ्ल्यान्डलाई ७ विकेटले हराएपछि सेमिफाइनल समीकरण पूरा भएको हो ।

समूह ‘बी’बाट दक्षिण अफ्रिका समूह विजेता बन्दै सेमिफाइनल प्रवेश गरेको छ । अष्ट्रेलिया उपविजेता बनेको छ । यो समूहबाट अफगानिस्तान र इङ्ग्ल्यान्ड बाहिरिएका छन् ।

समूह ‘ए’बाट न्युजल्यान्ड र भारत सेमिफाइनलमा पुगेका छन् । बङ्गलादेश र पाकिस्तान बाहिरिएको छ ।

न्युजिल्यान्ड र भारत दुवैले बङ्गलादेश र पाकिस्तानमाथि जित हासिल गर्दै ४–४ अङ्क जोडेका छन् । आज हुने न्युजिल्यान्ड र भारतबीचको खेलले समूह विजेताको टुङ्गो लाग्नेछ ।

फाइनल प्रवेशका लागि समूह ‘ए’को विजेताले समूह ‘बी’को उपविजेतासँग प्रतिस्पर्धा गर्नेछ ।