भारतले पाकिस्तानलाई हराउँदा कोहलीको शतक

काठमाडौं । आईसीसी च्याम्पियन्स ट्रफी क्रिकेटको दोस्रो खेलमा भारतले पाकिस्तानलाई ६ विकेटले पराजित गरेको छ ।पहिलो खेलमा बंगलादेशलाई पराजित गरेको थियो ।

पाकिस्तानले दिएको २४२ रनको लक्ष्य भारतले ४२‍.३ ओभरमा ४ विकेटको क्षतिमा पूरा गर्‍यो । भारतका लागि विराट कोहलीले शतकीय पारी खेले । कोहली १११ बलमा ७ चौकासहित १०० रनमा अविजित रहे ।

श्रेयस अय्यरले ५६ तथा शुभमन गिलले ४६ रन बनाए । पाकिस्तानका शाहीन अफ्रिदीले २ विकेट लिँदा अबरार अहमद र खुशदिल शाहले १–१ विकेट लिए ।

टस जितेर पहिले ब्याटिङ गरेको पाकिस्तानले ४९.४ ओभरमा अलआउट हुँदै २४१ रन बनाएको थियो । सौद शकीलले ६२ तथा कप्तान मोहम्मद रिजवानले ४६ रन बनाए ।

भारतका लागि कुलदीप यादवले ९ ओभरमा ४० रन दिएर ३ विकेट लिए । हार्दिक पान्ड्याले २ तथा हर्षित राना, अक्षर पटेल र रविन्द्र जडेजाले १–१ विकेट लिए ।

जितसँगै समूह ए मा भारतले २ खेलबाट ४ अंक जोडेको छ । पाकिस्तान भने जित बिहीन छ ।