नेपाल र म्यानमारबीचको खेल बराबरी, बुधबार फाइनल

काठमाडौं । काठमाडौंमा जारी इन्टरनेशनल वुमन्स च्याम्पियनसिप अन्तर्गत समूह चरणको अन्तिम खेलमा नेपाल र म्यानमारले बराबरी खेलेका छन् । दशरथ रंगशालामा २–२ गोलको बराबरीमा खेल सकिएको हो ।

दुवै टोलीले पहिलो हाफमा गोल गरे । दोस्रो हाफमा गोल गर्न सकेनन् ।

खेलको छैटौं मिनेटमा म्याट नो किनले फ्रिकिकमार्फत सिधै गोल गरिन् । ११औं मिनेटमा सावित्रा भण्डारीको पासमा सबिता रानामगरले खेल बराबरीमा ल्याइन् ।

१६औं मिनेटमा मे टेट नुले गोल गर्दै म्यानमारको अग्रता बनाइन् । ४०औं मिनेटमा सावित्राले गोल गरेपछि पहिलो हाफ २–२ को बराबरीमा आयो । त्यसपछि दोस्रो हाफमा दुवै टोलीले गोल गर्ने अवसर पाए पनि सदुपयोग गर्न सकेनन् ।

दुवै टोलीले ३–३ खेलबाट ७–७ अङ्क जोडेका छन् । गोलअन्तरका आधारमा म्यानमार पहिलो र नेपाल दोस्रो स्थानमा छ ।

फाइनल खेल बुधबार हुनेछ ।