यू–१९ एसिया कपमा पाकिस्तानमाथि नेपाल ६ विकेटले विजयी

काठमाडौं । एसीसी यू– १९ महिला एसिया कप क्रिकेटमा पाकिस्तानमाथि नेपाल ६ विकेटले विजयी भएको छ । मलेसियामा जारी प्रतियोगितामा नेपाल ६ विकेटले विजयी भएको हो ।

पाकिस्तानले दिएको १०५ रनको लक्ष्य नेपालले १ ओभरअगावै पूरा गरेको थियो ।

नेपालको जितमा कप्तान पुजा महतोले सर्वाधिक ४७ रन बनाएर अविजित रहिन् । सोनी पाख्रिनले १३ तथा ओपनर सना प्रवीनले १० रन बनाइन् ।

त्यसअघि पाकिस्तानले २० ओभरमा ५ विकेट गुमाएर १०४ रन बनाएको थियो । पाकिस्तानका कोमल खानले ३८ रन बनाइन् ।

पाकिस्तान पहिलो खेलमा भारतसँग पराजित भइसकेको थियो । पाकिस्तानलाई पराजित गरेको नेपाल सुपर फोरमा प्रवेश गरेको छ । नेपालले भोलि भारतसँग खेल्दैछ ।