एनपीएलमा आज दुई खेल हुने

काठमाडाैं । नेपाल प्रिमियर लिग (एनपीएल)मा आज बुधबार दुई खेल हुँदैछन् । एनपीएलको बुधबारको पहिलो खेलमा कर्णाली याक्स र काठमाडौँ गुर्खाज भिड्दै छन्।

कीर्तिपुरस्थित त्रिवि क्रिकेट मैदानमा हुने खेल बिहान ९ बजे सुरु हुनेछ । एनपीएलमा दोस्रो खेल खेल्न लागेका कर्णाली र काठमाडौं दुवै टोली पहिलो जितको खोजीमा छन् ।

कर्णाली सोमपाल कामी र काठमाडौं करण केसीको कप्तानीमा मैदान उत्रिँदै छन् । कर्णाली पहिलो खेलमा जनकपुर बोल्ट्ससँग ८ विकेटले पराजित भएको थियो।

आजै हुने दोस्रो खेलमा विराटनगर किंग्स र लुम्बिनी लायन्स भिड्दै छन् । यो खेल दिउँसो १ बजे सुरु हुनेछ । एनपीएलमा तेस्रो खेल खेल्न लागेको विराटनगर पहिलो जितको खोजीमा छ ।

विराटनगरले लिगको पहिलो खेलमा जनकपुरसँग ८ विकेटले पराजित भएको थियो। मंगलबार भएको आफ्नो दोस्रो खेलमा सुदूरपश्चिम रोयल्ससँग ९० रनको फराकिलो हार व्यहोरेको थियो । लुम्बिनीले एनपीएलमा पहिलो खेल खेल्न लागेको हो । लुम्बिनी राष्ट्रिय टोलीका कप्तान रोहित कुमार पौडेलको कप्तानीमा मैदान उत्रिनेछ ।