दक्षिण अफ्रिकालाई पराजित गर्दै न्युजिल्याण्डले जित्याे महिला टी–२० विश्वकपकाे उपाधि

विराटनगर । न्युजिल्याण्डले पहिलो पटक आईसीसी महिला टी– २० विश्वकप क्रिकेटको उपाधि जितेको छ । दक्षिण अफ्रिकालाई ३२ रनले पराजित गर्दै उपाधि जितेकाे हाे ।

न्युजिल्याण्डले दिएको १५९ रनको लक्ष्य पछ्याएको दक्षिण अफ्रिकाले ९ विकेट गुमाएर १२६ रन मात्र बनाउन सक्यो ।

न्युजिल्याण्डले तेस्रो पटक फाइनल खेल्दा पहिलो पटक महिला टी– २० विश्वकपको उपाधि जितेको हो । सन् २००९ मा सुरु भएको महिला टी– २० विश्वकपको सुरुवाती दुई संस्करणमा न्युजिल्याण्ड उपविजेता बनेको थियो ।

सन् २००९ को पहिलो संस्करणमा इंग्ल्याण्डसँग पराजित भएको न्युजिल्याण्ड २०१० को दोस्रो संस्करणमा अष्ट्रेलियासँग पराजित भएको थियो ।

दक्षिण अफ्रिकाका लागि कप्तान लाउरा वलभार्टले २७ बलमा ४ चौका मदतमा सर्वाधिक ३३ रन बनाइन् । ताज्मिन ब्रिट्सले १७, कोल ट्राएओनले १४ र अनेरिई डेर्कसेनले १० रन बनाए भने बाँकी खेलाडीले दोहोरो अंकमा रन जोड्न सकेनन् ।

न्युजिल्याण्डका लागि रोसमेरी मेइर र अमेलिया केरले ३– ३ विकेट लिए ।

त्यसअघि टस हारेर पहिले ब्याटिङ गरेको न्युजिल्याण्डले २० ओभरमा ५ विकेट गुमाएर १५८ रन बनाएको थियो । न्युजिल्याण्डका लागि अमेलिया केरले सर्वाधिक ४३ रन बनाइन् । उनले ३८ बल खेल्दै ३ चौका प्रहार गरिन् । यस्तै ब्रुकी हालिडेले २८ बलमा ३ चौका प्रहार गर्दै ३८ रन जोडिन् । ओपनर सुजी बेट्सले ३१ बलमा ३२ रन बनाइन् । म्याडी ग्रीन १२ रनमा अविजित रहिन् ।

सन् २०२४ मा दक्षिण अफ्रिकाको पुरुष र महिला दुवै टोली टी– २० विश्वकपको फाइनल पुगेपनि उपाधि जित्न सकेन ।