लालिगामा बार्सिलोनाको फराकिलो जित, राफिन्हाको ह्याट्रिक

विराटनगर । स्पेनिस ला लिगा फुटबलमा बार्सिलोनाले रियल भाल्लाडोलिडमाथि ७–० को जित निकालेको छ । बार्सिलोनको जितमा राफिन्हाले ह्याट्रिक गर्दा रोवर्ट लेवान्डोस्की, जुल्स कुन्डे, डानी ओल्मो र फेरान टोरेसले एक–एक गोल गरे ।

घरेलु मैदानमा भएको खेलको २०औं मिनेटमा राफिन्हाले गोल गर्दै बार्सिलोनालाई अग्रता दिलाएका थिए । त्यसको चार मिनेटपछि नै लेवान्डोस्कीले अग्रता दोब्बर पारे । जुल्स कोन्डे पहिलो हाफको इन्जुरी समयमा गोल गर्दा बार्सिलोनाले ३–० को अग्रता बनायो ।

६४औं मिनेटमा राफिन्हाले लेवान्डोस्कीको पासमा व्यक्तिगत दोस्रो गोल गरे ।

७२औं मिनेटमा राफिन्हाले गोल गर्दै आफ्नो ह्याट्रिक पूरा गरे भने बार्सिलोनाले ५–० को अग्रता बनायो । त्यसपछि ओल्मोले ८२औं र फेरान टोरेसले ८५औं मिनेटमा गोल गरेपछि बार्सिलोनाले फराकिलो अन्तरले जित निकालेको हो ।

नयाँ सिजनमा राम्रो सुरुवात गरेको बार्सिलोनाको यो लगातार चौथो जित हो । चार खेलबाट १२ अंक जोडेको बार्सिलोना शीर्ष स्थानमै आसिन छ ।