मड्रिड आएपछि एम्बाप्पेले भने,‘सपना पूरा भयो’

विराटनगर । केलियन एम्बाप्पे रियल मड्रिडको जर्सीमा देखिएका छन् ।

फ्रेन्च फर्वाड एम्बाप्पेलाई सान्टिएगो बेर्नाबाउमा करिब ८० हजार समर्थकले स्वागत गरे । २५ वर्षका एम्बाप्पले ५ वर्षको सम्झौता गरेका छन् ।

रियलमा रहने सम्झौतामा हस्ताक्षरपछि मैदान प्रवेश गरेका उनले रियल मड्रिडको जर्सी लगाउने सपना मंगलबार पूरा भएको प्रतिक्रिया दिए ।

९ नम्बर जर्सी लगाएका उनले स्पानिस भाषामा भने, ‘यो मेरा लागि अविश्वसनीय दिन हो । बालक हुँदादेखि नै मैले मड्रिडका लागि खेल्ने सपना देखेको थिएँ र आज म यहाँ छु । यो मेरा लागि निकै महत्वपूर्ण छ ।’

एम्बाप्पेलाई अनुबन्ध गर्नुलाई रियल मड्रिडका अध्यक्ष फ्लोरेन्टिनो पेरेजले क्लबका लागि ऐतिहासिक काम भनेका छन् । उनले भने, ‘आज हामी एक असाधारण खेलाडीलाई स्वागत गर्दैछौं, जसले आफ्नो बाल्यकालको सपना पूरा गर्दैछन् ।’