उपाधि जितेपछि एन्जल डि मारियाले लिए सन्यास

विराटनगर । अर्जेन्टिनाका खेलाडी एन्जल डि मारियाले अन्तर्राष्ट्रिय फुटबलबाट सन्यास लिएका छन् । कोपा अमेरिका २०२४ को उपाधि जितेपछि उनले सन्यास लिएका हुन् ।

कोपा अमेरिकापछि सन्यास लिने घोषणा गरेका डि मारियाले आफ्नो अन्तिम अन्तर्राष्ट्रिय खेलका रुपमा कोपा अमेरिका जिते ।

अर्जेन्टिनाले कोपा अमेरिका, फिफा विश्वकप जे जित्दा उनी मुख्य खेलाडी थिए । तर कप्तान लिओनल मेस्सी र गोलकिपर इमिलियानो मार्टिनेजको धेरै चर्चा भयो ।

मेस्सीको नेतृत्वलमा अर्जेन्टिनाले हात पारेका अन्तर्राष्ट्रिय सफलतामा डि मारियाको महत्वपूर्ण योगदान छ । आफ्नो अन्तिम अन्तर्राष्ट्रिय खेलमा कोलम्बियाविरुद्ध उनले लगभग पूरा समय खेले । उनी ११६ औं मिनेटमा रिप्लेस हुँदा मैदानबाट आशु झार्दै बाहिर आएका थिए ।

‘मैले यस्तै सपना देखेको थिएँ । त्यसैले त मैले यो कोपा नै मेरो अन्तिम प्रतियोगिता भनेको थिएँ र यहीँ सकियो’, डि मारियाले लगातार दोस्रो पटक कोपा अमेरिकाको उपाधि जितेपछि भने,‘ मैले फाइनल पुग्ने सपना देखेको थिएँ । मैले यस्तै गरी सन्यास लिन चाहेको थिएँ ।’

कोलम्बियालाई फाइनलमा १–० ले हराउँदै उपाधि जित्दा एन्जल डि मरिया नै खेलको प्लेअर अफ दि म्याच घोषित भए ।

सन् २००८ मा मेस्सीसँगै ओलम्पिकमा स्वर्ण जितेदेखि नै डि मारिया अर्जेन्टिनी टिमको स्टारको रुपमा थिए । ३६ वर्षीय डि मारियाले अर्जेन्टिनाका लागि १४५ खेल खेल्दै ३१ गोल गरेका छन् । उनले अर्जेन्टिनाका लागि ६ कोपा अमेरिका र ४ विश्वकप खेलेका छन् ।