युरो फाइनल : इतिहास रच्ने दाउमा स्पेन र इंग्ल्याण्ड

विराटनगर । युरो कप २०२४ को उपाधिका लागि स्पेन र इंग्ल्याण्ड भिड्दैछन् । फाइनल खेल मध्यराति १२ः४५ बजे बर्लिनस्थित ओलम्पिक स्टेडियममा हुनेछ ।

स्पेनले सेमिफाइनलमा बलियो टोली फ्रान्स र इंग्ल्याण्डले नेदरल्याण्ड्सलाई पराजित गरेर फाइनलमा स्थान पक्का गरेका हुन् । इंग्ल्याण्ड साविक उपविजेता टोली हो ।

स्पेन जारी युरोमा उत्कृष्ट लयमा छ । यी दुई टोली मध्ये फाइनल जसले जिते पनि इतिहास रच्नेछन् ।

स्पेनले जर्मनीसँगै अहिलेसम्म सर्वाधिक ३ पटक उपाधि जितेको छ । यो उपाधि जिते युरो चार पटक जित्ने पहिलो टोली बन्नेछ ।

स्पेनले सन् १९६४ को दोस्रो संस्करणमै उपाधि जितेको थियो । सन् २००८ र २०१२ मा पनि उपाधि जितेको थियो । स्पेनले सन् २०१० मा विश्वकप पनि जितेको थियो ।

इंग्ल्याण्डले भने अहिलेसम्म युरो उपाधि जित्न सकेको छैन । सन् २०२० को युरोमा फाइनल पुगे पनि इंग्ल्याण्ड घरेलु मैदानमा इटलीसँग पेनाल्टी सुटआउटमा पराजित हुँदै उपविजेता बनेको थियो ।

इंग्ल्याण्ड लगातार दोस्रो पटक युरो फाइनल खेल्दैछ । इंग्ल्याण्ड विजयी भएमा पहिलो पटक युरो च्याम्पियन बन्नेछ ।

इंग्ल्याण्डले अहिलेसम्म जितेको एक मात्र ठूलो उपाधि सन् १९६६ को फिफा विश्वकप हो ।

स्पेन र इंग्ल्याण्ड एकआपसमा भिड्दा इंग्ल्याण्डका कप्तान ह्यारी केन र स्पेनका डाद्दी ओल्मो सर्वाधिक गोलकर्ता बन्ने होडमा छन् । दुवैले समान ३ गोल गरेका छन् ।