इङ्ल्यान्ड लगातार युरो कपको फाइनलमा, उपाधिका लागि स्पेनसँग खेल्ने

विराटनगर । नेदरल्याण्ड्सलाई २–१ ले पराजित गर्दै इङ्ल्यान्ड युरो कप २०२४ को फाइनलमा प्रवेश गरेको छ ।

ओली वाट्किन्सले इन्जुरी टाइममा गरेको गोल मदतमा इङ्ल्यान्ड लगातार दोस्रो पटक फाइनल प्रवेश गरेको हो ।

दोस्रो हाफमा मैदान प्रवेश गरेको वाट्किन्सले इन्जुरी टाइमको पहिलो मिनेटमा निर्णायक गोल गरे ।

इङ्ल्यान्डले जुलाई १४ मा बर्लिनमा हुने फाइनलमा स्पेनको सामना गर्नेछ । स्पेनले पहिलो सेमिफाइनलमा फ्रान्सलाई पराजित गरेको थियो ।

डर्टमण्डको सिगनल इडुना पार्कमा भएको दोस्रो सेमिफाइनलमा नेदरल्याण्ड्सले पहिले अग्रता लिएको थियो । जावी सिमोन्सले खेलको सातौं मिनेटमै गोल गर्दै डच टोलीलाई पहिले अग्रता दिलाएका थिए । तर त्यो अग्रता लामो समय रहेन ।

१८औं मिनेटमा इङ्ल्यान्डका कप्तान ह्यारी केनले विवादित पेनाल्टीमार्फत बराबरी गोल फर्काए ।

नेदरल्याण्ड्सका डेन्जल डमफ्रिसले केनलाई पेनाल्टी बक्समा फल गरेपछि भिएआरको सहयोगमा इङ्ल्यान्डले पेनाल्टी पाएको थियो । केनले गोल गरे ।

८१औं मिनेटमा केनको स्थानमा मैदान प्रवेश गरेका वाटमिन्ट्सले कोल पाल्मरको पासमा इन्जुरी समयमा गोल गरे । पाल्मर पनि ८१औं मिनेटमै फिल फोडेनको स्थानमा मैदान प्रवेश गरेका थिए ।