गौतम गम्भीरले सम्हाल्नेछन् भारतीय क्रिकेट टोली

विराटनगर । भारतीय क्रिकेट टोलीको मुख्य प्रशिक्षकमा गौतम गम्भीर नियुक्त भएका छन् ।

भारतलाई सन् २००७ को टी–२० विश्वकप र २०११ को एकदिवसीय विश्वकप जिताउन महत्वपूर्ण योगदान गरेका गम्भीर प्रशिक्षक नियुक्त भएका हुन् ।

गम्भीरको कप्तानीमा कोलकाता नाइट राइडर्सले इन्डियन प्रिमियर लिग (आईपीएल) सन् २०१२ र २०१४ मा उपाधि जितेको थियो । सन् २०२४ मा कोलकाताले आईपीएलको उपाधि जित्दा उनी मेन्टर थिए ।

आईसीसी टी– २० विश्वकप २०२४ को उपाधि जितेसँगै राहुल द्रविडको भारतीय क्रिकेटमा मुख्य प्रशिक्षकको अवधि सकिएको थियो ।

बीसीसीआईका सचिव जय शाहले गम्भीर अब भारतको नयाँ मुख्य प्रशिक्षक बनेको जानकारी दिएका छन् । गम्भीरको भारतीय क्रिकेट टिमसँगको सम्झौता २०२७ डिसेम्बरसम्मको छ ।

४२ वर्षीय बायाँ हाते ब्याटर गम्भीर भारतका पूर्व सफल ओपनर हुन् । उनले भारतबाट ५८ टेस्ट, १४७ ओडीआई र ३७ टी–२० आई खेलेका थिए ।