स्पेन युरो कपको फाइनलमा पुग्दा यामलको कीर्तिमान

विराटनगर । स्पेन फ्रान्सविरुद्ध पुनरागमन जित निकाल्दै युरो कप २०२४ को फाइनलमा प्रवेश गरेको छ ।

मंगलबार राति म्युनिख एरेनामा भएको पहिलो सेमिफाइनलमा स्पेनले फ्रान्सलाई २–१ ले पराजित गर्दै स्पेन अन्तिम दुईमा प्रवेश गरेको हो ।

सेमिफाइनल खेलमा स्पेनका लामिन यामलले युरो कपमा सबैभन्दा कम उमेरमा गोल गर्ने कीर्तिमान बनाए ।

स्पेनले अब नेदरल्याण्ड्स र इंग्ल्याण्डबीच हुने सेमिफाइनलको विजेतासँग उपाधिका लागि खेल्नेछ ।

स्पेन विरुद्ध अग्रता भने फ्रान्सले लिएको थियो । नवौं मिनेटमै रान्डल कोलो माउनीले गोल गर्दै फ्रान्सलाई अग्रता दिलाएका थिए । तर, यो अग्रता लामो समय टिकेन ।

२१औं मिनेटमा लामिन यामलले पेनाल्टी बक्स बाहिरबाट टप कर्नरमा उत्कृष्ट गोल गर्दै खेल १–१ को बराबरीमा ल्याए ।

त्यसपछि डानी ओल्मोले २५औं मिनेटमा गोल गर्दै स्पेनलाई २–१ को अग्रता दिलाए । त्यसपछि खेलमा गोल हुन सकेन् । स्पेन २–१ ले विजयी भयो ।

स्पेनीस युवा स्टार यामलले १६ वर्ष ३६२ दिन हुँदा गोल गर्दै युरोमा गोल गर्ने सबैभन्दा कान्छो खेलाडीको कीर्तिमान बनाएका हुन् ।

यसअघि कम उमेरको कीर्तिमान स्विट्जरल्याण्डका जोहान भोलनान्थेनको नाममा थियो । उनले सन् २००४ को युरोमा फ्रान्स विरुद्धनै १८ वर्ष १४१ दिनको हुँदा गोल गरेका थिए ।