अर्जेन्टिना कोपा अमेरिकाको फाइनलमा

विराटनगर । अर्जेन्टिना कोपा अमेरिका फुटबलको फाइनलमा प्रवेश गरेको छ ।

लिओनल मेस्सीले जारी कोपा अमेरिका २०२४ मा पहिलो गोल गर्दा अर्जेन्टिनाले २–० गोल अन्तरले क्यानडालाई पराजित गर्दै फाइनलमा स्थान बनाएको हो ।

विश्वकप विजेता अर्जेन्टिनाले अब कोलम्बिया र उरुग्वेबीचको खेलको विजेतासँग उपाधिका लागि खेल्नेछ ।

मेटलाइफ स्टेडियममा बुधबार बिहान भएको खेलमा अर्जेन्टिनाका लागि मेस्सी र जुलियन अल्भारेजले गोल गरे । बुधबार विहान भएको खेलको २१औं मिनेटमा अल्भारेजले रोड्रिगो डे पउलको पासमा गोल गर्दै अर्जेनटिनालाई अग्रता दिलाएका थिए ।

दोस्रो हाफमा मेस्सीले गोल थपे । उनले ५१औं मिनेटमा एन्जो फर्नान्डेजको पासमा जारी कोपामा पहिलो गोल गरेका हुन् ।

साविक विजेता अर्जेन्टिना लगातार तीन ठूला प्रतियोगिता जित्ने लक्ष्यमा छ । २०२१ मा कोपा जितेको रअर्जेन्टिनाले २०२२ मा फिफा विश्वकप उपाधि जितेको थियो ।

आफ्नो करियरको सातौं कोपा खेलिरहेको मेस्सीले सन् २०११ बाहेक ६ संस्करणमा गोल गरेका छन् । उनले सन् २००७ मा पहिलो पटक कोपा खेल्दा दुई गोल गरेका थिए ।

यस्तै २०१५ मा १ गोल, २०१६ मा ५ गोल, २०१९ मा १ गोल र २०२१ मा ४ गोल गरेका थिए । मेस्सीले अहिलेसम्म कोपामा १३ गोल गरेका छन् ।