युरो कप : फाइनल प्रवेशका लागि फ्रान्स र स्पेन भिड्दै

विराटनगर । युरो २०२४ को फाइनल प्रवेशका लागि आज पूर्व विजेता स्पेन र फ्रान्सले प्रतिस्पर्धा गर्दैछन् । पहिलो सेमिफाइनल खेल नेपाली समय अनुसार राति १२:४५ मा सुरु हुनेछ ।

स्पेनले क्वाटरफाइनलमा आयोजक जर्मनीलाई हराउँदै अन्तिम चारमा स्थान बनाएको थियो । फ्रान्सले क्वाटरफाइनलमा पोर्चुगललाई पेनाल्टी सुटआउटमा ५–३ ले पराजित गर्दै अन्तिम चारमा स्थान बनाएको हो ।

दुई टोली मध्ये स्पेनले जारी युरोमा अहिलेसम्म ११ गोल गरिसकेको छ भने जम्मा दुई गोल मात्र बेहोरेको छ । फ्रान्स भने गोलका लागि संघर्षरत छ । जारी युरो कपमा फ्रान्सले दुई गोल गरेको छ । बाँकी खेलको नतिजा पेनाल्टीबाट निस्किएको छ ।

स्पेन १२ वर्षपछि युरो फाइनलमा पुग्ने लक्ष्यमा छ भने फ्रान्स पछिल्लो ८ वर्षमा चौथो पटक मुख्य प्रतियोगिताको फाइनल पुग्ने लक्ष्यमा छ । फ्रान्सले सन् २०१८ मा फिफा विश्वकपको उपाधि जितेको थियो भने २०१६ मा युरो फाइनल र २०२२ मा विश्वकप फाइनल खेलेको थियो ।

स्पेन र फ्रान्स मुख्य प्रतियोगितामा एकआपसमा प्रतिस्पर्धा गर्न लागेको यो छैटौंपटक हो । यसअघिका पाँचमध्ये तीन खेल फ्रान्सले जितेको छ । सन् १९८४ को युरो फाइनल, २००० को युरो क्वाटरफाइनल र २००६ को विश्वकपको प्रिक्वाटरफाइनलमा फ्रान्सले स्पेनलाई पराजित गरेको थियो ।

स्पेनले एक खेल जितेको छ । सन् २०१२ को युरो क्वाटरफाइनलमा स्पेनले फ्रान्सलाई पराजित गरेको थियो । १९९६ को युरोको समूह चरणमा भने यी दुई टोलीले बराबरी खेलेका थिए ।