युरो कप : क्वाटरफाइनलमा भिड्दैछन् चार उपाधि दाबेदार

विराटनगर । युरो २०२४ को उपाधि दाबेदार चार टोली आज क्वाटरफाइनलमा भिड्दैछन् । पहिलो क्वाटरफाइनलमा आयोजक जर्मनीले स्पेनसँग प्रतिस्पर्धा गर्नेछ भने दोस्रो क्वाटरफाइनलमा पोर्चुगल र फ्रान्सबीच खेल हुनेछ । चार वटै टोली युरो कपको उपाधि दाबेदार हुन् ।

स्पेन र जर्मनी बीचको खेल राति ९ः४५ बजे तथा पोर्चुगल र फ्रान्सबीचको खेल मध्यराति १२ः४५ बजे सुरु हुनेछ ।

चारै टोली पूर्व च्याम्पियन हुन् । आजको खेलपछि दुई दाबेदार टोली बाहिरिने छन् ।

स्पेन र जर्मनी युरोको सर्वाधिक सफल टोली हुन् । दुवैले समान ३ पटक युरो जितेका छन् । दुवै टोली जित निकाल्दै सेमिफाइनल पुग्ने लक्ष्यमा छन् । तर एक टोलीको मात्र लक्ष्य पूरा हुनेछ ।

स्पेनले सन् २००० यता दुई पटक युरो जितिसकेको छ । २००८ र २०१२ मा स्पेनले युरो जितेको थियो । स्पेनले १९६४ मा पहिलो पटक युरो जितेको थियो ।

जर्मनीले पछिल्लो पटक १९९६ मा उपाधि जितेको थियो । सन् १९७२ मा पहिलो पटक युरो जितेको जर्मनीले त्यसपछि १९८० मा दोस्रो पटक उपाधि जितेको थियो ।

स्पेन र जर्मनी भिड्दा दुवै टिमका युवा खेलाडीहरुमा नजर हुनेछ । स्पेनका फरवार्ड लामिन यामल र निको विलियम्स तथा जर्मनीका जमाल मुसिएलाले उत्कृष्ट प्रदर्शन गरिरहेका छन् ।

दोस्रो क्वाटरफाइनलमा पोर्चुगल र फ्रान्स भिड्दैछन् । फ्रान्सले सन् १९८४ र २००० मा युरो कप उपाधि जितेको थियो । पोर्चुगलले सन् २०१६ मा फ्रान्समै भएको युरो कपमा फ्रान्सलाई पराजित गर्दै उपाधि जितेको थियो ।

जारी सिजनमा दुवै टोली सामान्य लयमा छन् । पोर्चुगलका कप्तान क्रिस्टियानो रोनाल्डो सर्वाधिक युरो कपको खेल खेल्ने र गोल गर्ने कीर्तिमान बनाएका खेलाडी हुन् । तर उनी अपेक्षा अनुसार खेल्न सकेका छैनन् । फ्रान्सका कप्तान केलिएन एमबाप्पेको प्रदर्शन पनि उत्कृष्ट छैन ।

फ्रान्सले अन्तिम १६ को खेलको अन्त्यतिर आत्मघाती गोल मद्दतमा बेल्जियमलाई १–० ले पराजित गरेको थियो । पोर्चुगलले स्लोभेनियालाई पेनाल्टी सुटआउटमा ३–० ले पराजित गरेको थियो ।