कोपा अमेरिकाको सेमिफाइनलमा अर्जेन्टिना

विराटनगर । साविक विजेता अर्जेन्टिना कोपा अमेरिका २०२४ को सेमीफाइनलमा प्रवेश गरेको छ । क्वाटरफाइनलको पहिलो खेलमा इक्वेडरलाई पेनाल्टी सुटआउटमा ४–२ ले पराजित गर्दै अर्जेन्टिना सेमिफाइनल प्रवेश गरेको हो ।

अर्जेन्टिनाको सेमिफाइनल यात्रामा गोलकिपर एमिलियानो मार्टिनेज नायक बने ।

कप्तान लिओनल मेसीले पेनाल्टीमा गोल गर्न चुकेको खेलमा मार्टिनेजले दुई वटा पेनाल्टी बचाएपछि अर्जेन्टिना विजयी बनेको हो ।

त्यसअघि निर्धारित ९० मिनेटको खेल १– १ को बराबरीमा सकिएपछि खेलको नतिजा सिधै पेनाल्टी सुटआउटबाट भएको हो ।

३५औ मिनेटमा लिसान्ड्रो मार्टिनेजले गोल गर्दै अर्जेन्टिनालाई अग्रता दिलाएका थिए । कप्तान लिओनल मेसीको कर्नरमा एलेक्सिस म्याक एलिस्टरले मिलाएको पासमा लिसान्ड्रोले गोल गरेका थिए ।

दोस्रो हाफको ६१औं मिनेटमा इनर भ्यालेन्सियाले पेनाल्टीमा गोल गर्न नसक्दा इक्वेडरले बराबरी गर्ने मौका गुमायो । तर इक्वेडरले इन्जुरी टाइममा बराबरी गोल फर्कायो । इक्वेडरका केभिन रोड्रिगेजले बराबरी गोल गरेका थिए ।

पेनाल्टी सुटआउटमा अर्जेन्टिनाका लागि जुलियन अल्भारेज, एलेक्सिस म्याक एलिस्टर, नाहुल मोलिना र निकोलस ओटामेन्डीले गोल गरे ।अर्जेन्टिनाका कप्तान लिणनल मेसीले प्रहार गरेको पहिलो पेनाल्टी क्रस बारमा लागेको थियो ।

अर्जेन्टिनाका गोलकिपर मार्टिनजेले इक्वेडरका सुरुवाती दुई पेनाल्टी हानेका एन्जल मेना र एलान मिन्डाको प्रहार बचाएका थिए इक्वेडरका लागि जोन येबोअह र जोर्डी काइसेडोले मात्र पेनाल्टीमा गोल गरे । अर्जेन्टिनाले अब भेनेजुएला र क्यानडा बीचको विजेतासँग सेमिफाइनलमा खेल्नेछ ।