कोपा अमेरिकाको क्वाटरफाइनल समीकरण पूरा

विराटनगर । कोपा अमेरिका फुटबल २०२४ को क्वाटरफाइनल समीकरण पूरा भएको छ । बुधबार बिहान भएको समूह डी को अन्तिम दुई खेलपछि क्वाटरफाइनल समीकरण पूरा भएको हो ।

समूह ए बाट साविक विजेता अर्जेन्टिना र क्यानडा, समूह बी बाट भेनेजुएला र इक्वेडर, समूह सी बाट उरुग्वे र पानामा तथा समूह डी बाट कोलम्बिया र ब्राजिलले अन्तिम ८ मा स्थान बनाएका हुन् । समूह विजेता बनेका अर्जेन्टिना, भेनेजुएला र उरुग्वेले सबै तीन खेल जितेर शतप्रतिशत नतिजा निकालेका छन् ।

उपाधिका दुई दाबेदार टोलीहरू ब्राजिल र उरुग्वे यो पटक क्वाटरफाइनलमै भिड्ने भएका छन् । उरुग्वे अर्जेन्टिनासँगै संयुक्त रुपमा सर्वाधिक १५ पटकको उपाधि विजेता हो । ब्राजिलले ९ पटक कोपा अमेरिकाको उपाधि जितेको छ ।

उरुग्वे जारी संस्करण उत्कृष्ट लयमा छ । ब्राजिलले भने औसत प्रदर्शन गरिरहेको छ ।

उरुग्वे र ब्राजिल बीचको अन्तिम क्वाटरफाइनल खेलको विजेताले कोलम्बिया र पानामाबीच हुने तेस्रो क्वाटरफाइनल खेलको विजेतासँग सेमिफाइनल खेल्नेछ ।

पहिलो क्वाटरफाइनलमा साविक विजेता अर्जेन्टिनाले इक्वेडसरसँग खेल्नेछ भने भेनेजुएला र पहिलो पटक कोपा खेलिरहेको क्यानडाबीच दोस्रो क्वाटरफाइनल हुनेछ ।

क्वाटरफाइनल खेल तालिका

जुलाई ५ बिहान ६ः४५ बजे
अर्जेन्टिना भर्सेस इक्वेडर,
जुलाई ६ बिहान ६ः४५ बजे
भेनेजुएला भर्सेस क्यानडा,
जुलाई ७ बिहान ३ः४५ बजे
कोलम्बिया भर्सेस पानामा
जुलाई ७ बिहान ६ः४५ बजे
उरुग्वे भर्सेस ब्राजिल