भारतले विश्वकप जितेपछि राेहित र विराटकाे सन्यास घोषणा

विराटनगर । भारतले आईसीसी टी–२० विश्वकप २०२४ को उपाधि जितेको छ । दक्षिण अफ्रिकालाई ७ रनले हराउँदै भारतले दोस्रो पटक उपाधि जितेको हो । यसअघि भारतले सन् २००७ मा उपाधि जितेको थियो ।

१७७ रनको विजयी लक्ष्य पछ्याएको दक्षिण अफ्रिकाले २० ओभरमा ८ विकेट गुमाउँदै १६९ रन बनायो ।

विश्वकप जितेपछि भारतका दुई अनुभवी खेलाडीले सन्यास घोषणा गरेका छन् । कप्तान रोहित शर्मा र विराट कोहलीले सन्यास घोषणा गरेका हुन् ।

रोहितले टी २० आईबाट सन्न्यास लिएको घोषणा गरे । भारतलाई टी–२० विश्वकपको उपाधि जिताउन उनको कप्तानी र प्रदर्शन दुबैमा सानदार योगदान रह्यो । विश्वकप २०२४ मा उनले ८ खेलमा २५७ रन बनाएका थिए । रोहित टी–२० आई क्रिकेटमा सर्वाधिक रन बनाउने ब्याटर हुन् ।

उनले १५९ टी–२० आई खेलमा ५ शतक र ३२ अर्धशतकसहित कुल ४ हजार २३१ रन बनाएका थिए । उनले सन् २००७ मा टी–२० आईमा इंग्ल्यान्डविरुद्ध डेब्यू गरेका थिए । भारतले २००७ मा टी–२० विश्वकप उपाधि जित्दा उनी टोलीको सदस्य थिए । उनको कप्तानीमा भारतले ६२ टी २० आई खेलमा ४९ मा जित र १२ खेलमा हार व्यहोरेको थियो ।

भारतलाई उपाधि जिताउन प्लेयर अफ द म्याच अवार्ड जित्दै विराट कोहलीले आफ्नो अन्तिम टी– २० आई खेल भएको बताएका थिए ।

३५ वर्षीय कोहलीले भारतबाट १२५ टी– २० आई खेलमा १ शतक र ३८ अर्धशतकसहित कुल ४ हजार १ सय ८८ रन बनाएका थिए ।

उनले सन् २०१० मा जिम्बावेविरुद्ध हरारेमा टी– २० आईमा भारतबाट डेब्यू गरेका थिए । उनी टी– २० आईमा सर्वाधिक ७ पटक प्लेयर अफ द सिरिज जित्ने खेलाडी हुन् ।