विश्वकप सेमिफाइनल : भारत र इंग्ल्यान्डको खेलमा वर्षा डर

विराटनगर । टी–२० विश्वकपको फाइनल प्रवेशका लागि आज भारत र इंग्ल्यान्ड भिड्दैछन् । नेपाली समय अनुसार राति ८ः१५ मा सुरु हुने खेलमा वर्षा बाधक हुने सम्भावना छ ।

वर्षाका कारण खेल नभए भारतीय टोली सुपर–८ राउन्डमा समूहको शीर्ष स्थानमा रहेको आधारमा फाइनल पुग्नेछ । दक्षिण अफ्रिका अफगानिस्तानलाई पराजित गर्दै फाइनल प्रवेश गरिसकेको छ । आजको बिजेताले उपाधिका लागि दक्षिण अफ्रिकासँग जुन २९ मा खेल्नेछ ।

आज ७० प्रतिशत वर्षा हुने सम्भावना छ । रिजर्भ डे नभएका कारण आजको खेल नभए भारत स्वत फाइनल पुग्नेछ ।

सेमिफाइनलका लागि रिजर्भ डे नहुने भए पनि खेलका लागि २५० मिनेटको अतिरिक्त समय दिइएको छ । त्यसैले बेलाबेलामा वर्षा रोकिन थाल्यो भने खेल कुनै न कुनै रूपमा टुङ्गिन सक्छ ।

भारत र इंग्ल्यान्डको खेल गुयानाको स्थानीय समय अनुसार बिहान १०ः३० बजे सुरु हुनेछ । यदि पानी पर्न थाल्यो भने, आईसीसीको नियम अनुसार सेमिफाइनल र फाइनलमा डीएलएस विधिका लागि कम्तीमा १०–१० ओभरको खेल हुनेछ ।

टी–२० विश्वकपमा समूह र सुपर–८ चरणका ५२ खेल भएका छन् । जसमध्ये ८ खेल वर्षाले प्रभावित भएका थिए ।  डिफेन्डिङ च्याम्पियन इंग्ल्याण्ड र स्कटल्याण्डबिचको खेल पनि वर्षाका कारण अनिर्णीत बनेको थियो । भारत र क्यानडाबिचको समूह खेल वर्षाका कारण रद्द भएको थियो ।