विराटनगरमा दुर्घटनामा परेकाे स्कार्पियोमा ३९८ किलाे गाँजा बरामद

विराटनगर । शनिबार राति विराटनगर महानगरपालिका–३ आयल निगममा दुर्घटनामा परेको स्कार्पियो गाडीबाट ३९८ किलो गाँजा बरामद भएको छ ।

शनिबार राति १० बजे कोशी राजमार्गमा दुर्घटना भएकाे स्करपियाेबाट ३९८ किलाे गाँजा बरामद भएकाे हाे ।

प्रहरी चौकी बरगाछीले गरेको आकस्मिक चेकिङ टोलीलाई देखेर इटहरीबाट विराटनगरतर्फ आउँदै गरेको को१च ७३९९ नम्बरको स्कार्पियो गाडी यु-टर्न गरी भाग्ने क्रममा स्कार्पियोले सोही दिशाबाट आउँदै गरेको बागमती प्रदेश ०१-०३० च ४८२२ नम्बरको कारलाई ठक्कर दिएको थियो । लगत्तै स्करपियो चालक फरार भएका थिए ।

दुर्घटनापश्चात् तत्काल प्रहरी चेकिङ टोलीले स्कार्पियो गाडीभित्र खोजी गर्दा लुकाइछिपाइ राखिएको १३ पोका गाँजा बरामद गरेको थियो । बरामद गाँजा ३९८ केजी रहेको मोरङ प्रहरी प्रवक्ता डिएसपी मकेन्द्रकुमार मिश्रले जानकारी दिए । फरार चालकको खोजी भइरहेको उनले बताए । दुवै सवारी साधन प्रहरी नियन्त्रणमा रहेको उनले बताए ।