सर्पकाे टाेकाइबाट बालिकाकाे मृत्यु

विराटनगर । सुनसरी इटहरीकी ८ वर्षीया आस्वाना चौहानको सर्पदंशपछि उपचार पाउन नसक्दा मृत्यु भएको छ ।

बुधबार साँझ घरभित्र खेलिरहेकाे बेला उनलाई गोमन सर्पले टाेकेकाे थियाे । बायाँ हातमा टोकेपनि उनले परिवारलाई तुरुन्तै बताइनन् । परिवारले थाहा पाउँदा  उनकाे अवस्था बिग्रिएकाे थियाे । लगतै परिवारले उनलाई इटहरीस्थित सर्पदंश उपचार केन्द्र लगे, तर अवस्था जटिल रहेकाले बालिकाको उपचार नहुने जानकारी दिइयो ।

त्यसपछि धरानको बीपी कोइराला स्वास्थ्य विज्ञान प्रतिष्ठान लगिँदा उपचार सुरु भए पनि पीआईसीयू खाली नभएको भनियो । अन्तिममा विराटनगरको विराट शिक्षण अस्पताल पुर्याइँदा बुधबार साँझ ८ः१७ बजे चिकित्सकले उनलाई मृत घोषणा गरे ।

बालिकालाई डसेको सर्प स्थानीयले नियन्त्रणमा लिई मारेका थिए । शव विराट शिक्षण अस्पतालमै राखिएको छ । याे घटनाले सर्पदंश उपचार र बालसघन उपचार सेवाको अभावलाई पुनः उजागर गरेको छ ।