जेनजी आन्दोलनको एक वर्ष : सत्ता फेरिएपनि फेरिएन प्रवृत्ति

काठमाडौं । जेनजी आन्दोलनको एक वर्ष पूरा भएकाे छ । याे  अवधिमा नेपालको राजनीतिमा ठूलो सत्ता परिवर्तन भए पनि राजनीतिक दलहरूको सोच र शैलीमा भने खासै परिवर्तन आउन नसकेको देखिएको छ ।

२०८२ भदौमा भ्रष्टाचार, कुशासन र बेथितिविरुद्ध सुरु भएको आन्दोलनमा ७६ जनाको ज्यान गएको थियो । दबाबका कारण तत्कालीन प्रधानमन्त्री केपी शर्मा ओलीको सरकार ढल्यो र सुशीला कार्कीको नेतृत्वमा अन्तरिम सरकार बन्यो । साे सरकारले फागुन २१ गते गरेकाे निर्वाचनमा राष्ट्रिय स्वतन्त्र पार्टीले ठूलो जित हासिल गर्याे । कांग्रेस, एमाले जस्ता पुराना दललाई ठूलो धक्का दियो । तर निर्वाचनपछि पनि पुराना दलभित्र नेतृत्व परिवर्तन र संरचनागत सुधार हुन सकेको छैन । नयाँ सरकारकाे कार्यशैली प्रति पनि आम जनता सन्तुष्ट छैनन् ।

आन्दोलनताका सरकार र जेनजी प्रतिनिधिबीच भएको १० बुँदे सम्झौताकाे  पूर्ण रूपमा कार्यान्वयन हुन सकेको छैन । सहिद परिवारलाई राहत घाइतेलाई क्षतिपूर्ति, भ्रष्टाचार छानबिन आयोग र जेनजी परिषद् गठन जस्ता प्रमुख विषय अझै अलपत्र छन् । जेनजी अगुवाहरूले नयाँ सरकार पनि पुरानै शैलीमा चलेको आरोप लगाउँदै प्रतिबद्धता पूरा नभए फेरि आन्दोलनको चेतावनी दिएका छन् ।

सत्तारुढ रास्वपाभित्रै पनि सरकारको कार्यशैलीप्रति असन्तुष्टि देखिन थालेको छ । बाढी उद्धारमा ढिलाइ र जेनजी स्मृति कार्यक्रमको व्यवस्थापनलाई लिएर पार्टीका आफ्नै सांसदहरूले प्रश्न उठाएका छन् ।