रिजालको ग्यासलाई २ लाख ९५ हजार रुपैयाँ जरिवाना

विराटनगर । जिल्ला प्रशासन कार्यालय मोरङले  रिजालको भान्सा ग्यास उद्योगलाई कारबाही गरेको छ । यसअघि कोशी ग्यास उद्योगलाई कारबाही गरेको थियो ।

बुधबार बुढीगंगा गाउँपालिका– ५ मा रहेको ‘रिजालको भान्सा ग्याँस उद्योग प्रालिलाई उपभोक्ता हित विपरीत कार्य गरेको भन्दै २ लाख ९५ हजार रुपैयाँ जरिवाना गरेको हो ।

वाणिज्य आपूर्ति तथा उपभोक्ता संरक्षण कार्यालय, जिल्ला प्रशासन कार्यालय, गुणस्तर तथा नापतौल कार्यालयसहितको बजार अनुगमन टोलीले गरेको निरीक्षणका क्रममा उद्योगमा लापरबाही भेटिएको थियो ।

अनुगमन टोलीले उद्योग परिसरमा रहेका १९ वटा भरिएका सिलिण्डरहरूको तौल परीक्षण गरेको थियो । जसमध्ये एउटा सिलिण्डरमा तोकिएको भन्दा २४० ग्राम कम ग्यास फेला परेको थियो । उद्योगले म्याद गुज्रिएका दुई वटा सिलिण्डरमा समेत ग्यास भरेर बिक्रीका लागि बजार पठाउन तयारी गरेको अवस्थामा फेला पारेको थियो । म्याद नाघेका सिलिण्डर प्रयोग गर्नु जोखिमपूर्ण हुन्छ ।

कम तौल र म्याद नाघेका सिलिण्डर फेला परेपछि अनुगमन टोलीले उद्योगलाई २ लाख ९५ हजार रुपैयाँ जरिवाना गरेको थियो । अनुगमनका क्रममा ग्यास उद्योग भने बन्द अवस्थामा थियो ।

अनुगमनका क्रममा विराटनगर महानगरपालिका– ३ मा रहेको कञ्चनेश्वर ग्यास पसललाई पनि कारबाही गरेको छ । अनुगमन टोलीलाई जाँचबुझ र निरीक्षणको कार्यमा अवरोध पुर्‍याएपछि पसललाई १५ हजार रुपैयाँ जरिवाना गरेको जिल्ला प्रशासन कार्यालय मोरङले जनाएको छ । साउन २३ गते बुढीगंगा गाउँपालिका–४ मा रहेको कोशी ग्यास उद्योग ग्यासले तौलमा अनियमितता गरेको भेटिएपछि प्रशासनले कारवाही गरेको थियो ।