कोशी प्रदेश : नेकपाभित्र मन्त्री छान्न सकस

विराटनगर । कोशी प्रदेश सरकार विस्तारको तयारीसँगै  नेपाली कम्युनिस्ट पार्टी (नेकपा) भित्र मन्त्री छान्न सकस देखिएकाे छ । सत्ता साझेदार नेकपा एमाले नेकपालाई ४ वटा मन्त्रालय दिने सहमति गरेकाे छ । साे ससहमत भएपछि नेताहरूबीच दौडधुप बढेको छ ।

नेकपाभित्रको आन्तरिक भागबण्डा अनुसार साविक माओवादी केन्द्रले ३ र एकीकृत समाजवादीले १ मन्त्रालय पाउने सहमति  छ ।  एकीकृत समाजवादी समूहबाट प्रत्यक्ष निर्वाचित खिनु लङवा लिम्बु र समानुपातिक सांसद विद्या चाम्लिङ दाबेदारका रुपमा छन् ।  पूर्वमाओवादी तर्फ आकाक्षी धेरै छन् ।

मन्त्रीहरूको नाम र सरकारमा पार्टीको भूमिकाबारे अन्तिम टुंगो लगाउन नेकपाले शनिबार दिउँसो २ बजे संसदीय दलको बैठक बोलाएको छ ।

१७ सांसद रहेको नेकपामा पूर्व माओवादीका १३ र पूर्व एकीकृत समाजवादीका ४ जना सांसद छन् ।