कोशीको किचलो सुल्झाउन अध्यक्ष ओलीको सक्रियता

विराटनगर । नेकपा (एमाले) कोशी प्रदेशभित्र चुलिएको आन्तरिक विवाद समाधानका लागि पार्टी अध्यक्ष केपी शर्मा ओलीले सक्रियता देखाएका छन् । कोशी प्रदेश सरकार र संसदीय दलभित्र देखिएको असमझदारी चुलिएपछि अध्यक्ष ओलीले मुख्यमन्त्री हिक्मतकुमार कार्कीसहित प्रदेशका शीर्ष नेताहरूलाई छलफलका लागि काठमाडौँ बोलाएका हु्न् ।

अध्यक्ष ओलीको सचिवालयका अनुसार, मुख्यमन्त्री कार्की आज दिउँसो ३ बजे ओली निवास भक्तपुरकाे गुण्डु पुग्ने छन् । छलफलका लागि मुख्यमन्त्री कार्कीसँगै एमाले कोशी प्रदेशका इन्चार्ज शेरधन राई र प्रदेश कमिटी अध्यक्ष घनश्याम खतिवडालाई पनि बोलाइएको छ।

पछिल्लो समय कोशी एमालेभित्र मुख्यमन्त्री परिवर्तनको विषयलाई लिएर दुई धार देखिएको छ ।

अध्यक्ष ओलीले मुख्यमन्त्री कार्कीको विकल्पमा तिलकुमार मेन्याङ्बोलाई अघि सार्ने प्रयास गरेपछि पार्टीभित्र आन्तरिक कलह बढेको हाे । उक्त प्रयास सफल हुन नसकेपछि यो विवाद प्रदेशबाट केन्द्रसम्म पुगेको हो ।

अध्यक्ष ओलीले यो विवादलाई थप बल्झिन नदिन संवादमार्फत निकास खोज्ने तयारी गरेका हुन् । सचिवालय स्रोतका अनुसार ओलीले मुख्यमन्त्री कार्की, इन्चार्ज राई र अध्यक्ष खतिवडासँग सामूहिक र आवश्यकता अनुसार ‘वान टु वान’ भेटवार्ता गर्नेछन् ।